Cuant che i call center a clamin i utents dal Cjanâl di Sant Pieri, ur corin i sgrisui jù pe schene pal numar di clamadis butadis jù. «Ma cemût? Nol scolte nancje la nestre propueste straordenarie?» e domande cun stice la puarine che dispès si cjate in Albanie.
Epûr, ve. Culì, dulà che e opare la Secab, al è pôc ce fâ: lis boletis si pain di mancul. Cuant che si è socis, la fuarpeade e je sù par jù dal 40%, rispiet a ce che si cjate a paiâ un utent di Udin. Ufierte straordenarie o no, di simpri al è cussì. Di cuant che e je nassude cheste Societât eletriche cooperative Alto Bût, il presit al è stât concorenziâl. Di simpri: ancjemò prime che a rivassin i call center e la liberalizazion dal servizi, cu lis nomenadis “bleonadis” di Bersani e dal Guvier Prodi.
Efiet di un sburt braurôs e ante litteram di un ciert autonomisim. Rivât dal teritori. E di une azion che vuê si disarès di lobby, ma studiade e coordenade cun altris cooperativis, par fâ valê un dirit: chel di produsisi di bessôi la corint, di gjestîse, e tal câs di vendile al mostri nazionâl che chê volte, in regjim monopolistic, al stave nassint e si clamave Enel.
Al jere il 1962. Par leç, l’Ent Nazional Energjie Eletriche al varès gjestît dut lui: produzion, rêt e distribuzion. Dut al sarès stât acuisît dal stât centrâl. Dutis lis centrâls talianis di produzion a finivin culì, ma no chês societâts cooperativis che a vevin un limit di produzion, sot dai 15 milions di Kw. Chês a podevin sielzi di continuâ a produsi e a gjestîsi la corint di bessolis. Par chê deroghe, si doprarin i miôr sherpa des tratativis politichis locâls. A Paluce, un al jere Emilio Di Lena, mestri, cerviel fin, pene rafinade e inteletuâl che no si varan plui di compagns. Diccì doc, ma cheste e je une altre storie. Ancje i politics regjonâi e i parlamentârs di che ete a jerin une altre storie. La lôr azion, insiemi, e fo fondamentâl par che Secab vuê e continui e jessi un model, jenfri lis coop de Cjargne, che di resint no àn lusît cuissà ce.
L’articul 8 come 4 di chê leç dal 1962 al fo il pont di une vitorie, che al lassà lis robis cemût che a stavin a Paluce là che e operave Secab e a Fors Disore, dulà che invezit ancjemò in dì di vuê al funzione alc di simil, la “Idroelettrica”. Par une altre deroghe si salvà ancje la Idroeletriche de Valcjanâl, che e cuvierç il Tarvisian. Secab si è slargjade di in chê volte: di Paluce, i cablis de alte tension a son rivâts ancje a Trep, Ravasclêt, Liussûl, Çurçuvint e, par ultin, a Sudri. Tal 2011, cuant che e fasè fieste pai cent agns, e veve passe 2.600 socis.
La gnove vuê e je che in Secab al è cambiât il president. Andrea Boz, un zovin architet, al à cjapât il puest dal president, ex sindic di Trep, Luigi Cortolezzis. La sielte, «par rinovâ e tornâ a lançâ la operativitât aziendâl, soredut par vie dai invistiments strategjics, tal rispiet inderogabil dai valôrs de cooperazion, secont l’intindiment dai socis fondatôrs» a disin de sede centrâl, di vie Pâl Piçul. Cemût lavoraraial il gnûf president? Cuâi i gnûfs progjets? Il 2017 al sarà l’an par «tornâ a meti man e par cualificâ i implants di Fontanon (Tamau); Enfretors (Paluce) e Nearies (Sudri). O sperìn di rivâ adore di costruî une piçule centrâl in Cuel Alt (Cleulis), o vin inviât l’iter pe valutazion in Regjon. L’intervent strategjichementri plui impuartant al sarà chel de centraline di Enfretors, pont storic de Secab: ampliament dal edifici e rinovament des turbinis» al dîs Andrea Boz. «Cun altris sogjets internazionâi, po dopo o sin impegnâts ae realizazion dal progjet di un eletrodot transfrontalîr cu la Austrie. Al sarà di 132 kV e dut sot tiere». Cuissà che Terna no impari cemût che si fâs.
Par ultin, Secab e sta studiant la pussibilitât di slargjâ la sô struture di bande largje, par dâ internet svelt ai residents dal Cjanâl di Sant Pieri e la costituzion di une rêt locâl par “cjamâ” di corint lis machinis eletrichis. Al studi, e duncje al è dome ancjemò un intindiment, un colegament diret jenfri la linie di distribuzion Secab e lis centrâls idroeletrichis e a energjie eoliche che si cjatin sul versant austriac, li dal Pas di Mont di Crôs. ❚
✒ Oscar Puntel
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +
Sport… che ti trai! / Pietro Corredig e Sonia Borghese: une vite di pignatis a scufiots
servizis di Francesco Tonizzo
La cubie dai cjanalots, un di San Pieri e une di Miers, e à vinçût il campionât talian di machinis storichis e il titul european, simpri cun Sanremo intal destin Inzen, passion, amôr, dedizion, voie di zirâ il mont, spirt competitîf, leam cun il teritori des Vals dal Nadison, e risultâts une vore preseâts. Il […] lei di plui +
L’EDITORIÂL / La identitât e ven dai zovins
Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +