Al torne Suns Europe. Udin capitâl de Europe «unide te diversitât»

Cumò e je propit ore di Suns Europe. Lis datis a son chês definitivis e il program ancje, che al met dongje tancj events une vore interessants. Si pues tacâ pardabon a fâ il cont par ledrôs, in spiete che al rivi il prin di Dicembar cuant che a cuatri e mieze dopo di misdì e sarà la scree uficiâl de seconde edizion dal Festival european des arts performativis tes lenghis minoritariis che al è stât fat pe prime volte un an indaûr. Udin e Friûl si preparin par tornâ a jessi il cûr de Europe de diversitât linguistiche e de creativitât e par jemplâsi di musiche, di imagjins, di peraulis. In struc: par jemplâsi di Suns e di Europe, di Suns Europe!
Pal 2016 la kermesse, metude adun cul jutori de ARLeF, cul coordenament di Radio Onde Furlane e cu la colaborazion di une schirie di sogjets e istituzions dal Friûl e dal rest de Europe, e presente sei tancj elements di continuitât cun chê dal an passât, sei ancje cualchi novitât une vore significative. Al è il câs des «coordenadis spazitemporâls» de manifestazion, che tal 2015 e jere sparniçade ator pe Patrie vie par trê setemanis, intant che par chest an e sarà dute concentrade tai prins trê dîs di Dicembar, a Udin e lì dal Teatri Giovanni da Udine, là che te sô prime edizion e jere stade fate dome la serade finâl de sezion dedicade ae musiche.
Tal «Teatron» che si cjate insom dal Borc di Trep al sarà spazi pai incuintris cui autôrs, pes proiezions di films e videos, pes leturis, pes esibizions e pai concierts. In continuitât cu la prime edizion e sarà la atenzion viers di diviers espressions de creativitât tes lenghis des minorancis e des nazions cence stât: la scriture, tra poesie, narative e teatri; la produzion audiovisive, tra cine, tv e web, oparis di finzion e documentaris; la musiche.
E sarà la ocasion, par esempli, di cognossi di dongje Xavi Sarrià, scritôr e musicist di Valencia, autôr di doi romançs e vôs e ghitare dai Obrint Pas, un dai grups miôr dai Paîs Catalans. Si podarà viodi cines par gaelic irlandês, par inuit e par basc e cognossi lis vôs e i viers di poetis de Galizie ae Ocitanie. E si scoltarà ancje un grum di musiche dal vîf, in linie cu la tradizion inviade ancjemò tal 2009, cuant che al nasseve Suns (e vonde), Festival de cjançon tes lenghis des minorancis de Europe  alpine e mediteranie.
Al avîs di partecipazion, metût in rêt ai prins di Setembar, a àn rispuindût in tantonons. Dome pe musiche a son stâts sù par jù cincuante di lôr, tra grups e soliscj, in rapresentance di vincjesiet comunitâts linguistichis. Di dutis chês propuestis a son stadis selezionadis siet, che a saran protagonistis de serade finâl dai 3 di Dicembar e dai concierts che si fasaran vie pai trê dîs dal festival. Si va di Veronika Usholik, cjantante che e rive de lontane Chucokta (Russie) ai rockers bretons Brieg Guerveno, dai Steso des isulis Faer Oer ai galizians Familia Caamagno, dai rappers irlandês Imlé ae cjantante frisone Norma e al performer de Chakassie (Russie) Gurude. Si zontaran ancjemò altris trê di lôr, daûr dai risultâts di Suns Ladinia (viôt il box inte pagjine).
Il program in detai e dutis lis informazion che a coventin si cjatin in rêt ae direzion www.sunseurope.com. ❚
✒ Marco Stolfo
____________________________________________
Musiche: di Suns Ladinia a Suns Europe

Pe sezion musicâl, la strade che e puarte a Suns Europe e passe pe Val di Fasse. Ai 19 di Novembar li dal Teatri Navalge di Moena si fasarà Suns Ladinia, la preselezion ‘live’ dai grups e dai soliscj di chê part dal continent european che si cjate tra lis Alps e il Mediterani. Protagoniscj de serade, inmaneade cul  coordenament de associazion La Grenz cu la poie des istituzions di chenti, a saran il rapper cjargnel Doro Gjat, il performer sart Arrogalla, il cjantautôr griko Rocco De Santis, la cjantante rumance She York, i rockers ladins Berdon, il lôr paisan Marco Mattia e i ocitans TRIP. ❚(M.S.)
___________________________________________
Il Friûl in vetrine, de leterature al vin
La Europe che si da dongje in Friûl e il Friûl che si fâs viodi e preseâ in Europe. Il festival che ai prins di Dicembar al jemplarà Udin di suns e di siums al sarà ancje une ocasion pe nestre comunitât par mostrâ la sô muse, la sô lenghe e la sô produzion culturâl plui gnove e plui interessante.
Un dai prins events di Suns Europe di chest an al sarà la presentazion dal gnûf libri di Stiefin Morat. Publicât di KappaVu, il so titul al è Kebar Krossé e al è un romanç afro/furlan: cui che al à za let alc di chel test al dîs che al è il degn erêt di Donald dal Tiliment.
Propit lis aventuris di Pidin e Saco, i protagoniscj sfolmenâts di chel libri saltât fûr tal 2000, a saran il cûr di une leture seniche par cure di Teatro Sosta Urbana, che si proviôt par sigûr «performative»: furlane, babeliche e trastolone.
Une altre anteprime furlane e je chê di Friûl Revolution, la serie produsude pe television de bande  dai Cjastrons e di Marco D’Agostini, che e conte in maniere comiche e sureâl il Friûl rivoluzionari che al è e che al sarà (forsit…). Il Friûl furlan al sarà sul schermi ancjemò cuntune altre novitât: il prin episiodi di Int/Art, il documentari di Dorino Minigutti che al conte i creatîfs di chenti «under 35».
Te sezion dedicade ae produzion audiovisive al sarà spazi ancje pal Friûl di lenghe slovene, cul cine di Giovanni Chiariot Brez Mej, intant che la pluralitât linguistiche des Alps al Adriatic e de Livence al Timau si mostrarà ancje tai incuintris dedicâts ae poesie.
Cun di plui, dongje dai incuintris tra artiscj, lenghis e lengaçs, Suns Europe e darà spazi ancje a une altre tipicitât, cun trê ocasions par cerçâ i vins furlans e chei ocitans. ❚(M.S.)