Sfuei Mensîl Furlan Indipendent
Archivi de Patrie

AL CINE CUN BETE. Gnotul-man

Bete di Spere

Bruce Vuaìne, un frut di vot agns, fi di doi miliardaris, une sere al jes dal cine cun so pari e sô mari, ma un malvivent ur va dongje cuntune pistole par une rapine, e dopo vêur robât i bêçs, ju cope, lassânt li, vîf e plen di pôre, dome il piçul.
In chê sere, Bruce al zure di lotâ dute la vite cuintri i criminâi de so citât, Gonârs City.
Cressût dal maiordom di cjase Vuaìne, Bruce al scomence une schirie di alenaments pe ment e pal spirt, robis impussibilis par cualsisei furlan, come stâ dôs oris devant di un spritz e di une fete di frico cence cerçâju, o cjalâ un ort plen di jerbatis cence gjavânt nancje une. Dopo agns e agns, Bruce al è pront: “O sarai une creature nere, che e fâs pôre dome a cjalâle”
“Un arbitri di Juve-Udin?”, al rispuint il maiordom.
“Biele idee, ma no: o vevi tal cjâf un gnotul”, al dîs Bruce.
E cussì, al devente Gnotul-Man, si fâs un costum di gnotul e al costruìs la Gnotul-mobile: une Ape cul motôr trucât e cun tacâts cent mil imprescj, come un canon, un radar e ancje une vuarzine (no si sa mai).
In chei dîs, un gnûf malvivent al sta fasint tremâ di pôre Gonârs City: Joker, un om vistît di paiaç, che al sta metint sot incjantesim dute la citât cuntun bevarin speciâl. Ducj chei che lu bevin, no rivin plui a lavorâ e a àn dome voie di ridi e di lâ a cjapâ soreli (cumò provait a induvinâ di dulà che al ven Joker!).
Un disastri: a Lignan no je plui nancje une buse par parcâ e Gonârs City al sta lant a tocs, parcè che nissun al comede plui nuie.
Ma il plan di Joker al è ancjemò plui ambiziôs: al vûl meti il so bevarin tal stabiliment de Goccia di Carnia, par spandi la sflacje e la voie di lâ al mâr in dut il Friûl. Gnotul-man al fâs di dut par fermâ Joker, e al clame ancje in jutori un so amì supereroi: Robin? No, Capitan Cjargne.
Ma Joker al ferme Capitan Cjargne cjantant “El can de Trieste” (lis cjançons triestinis a anulin ducj i siei superpodês).
Gnotul-man, cu la sô potente Gnotul-mobile, al rive a cjapâ Joker prime che al meti il bevarin te aghe naturâl, ma nol baste: il manigolt al veve bielzà incuinât chê cu lis bufulutis.
Par fortune, lis bufulutis de Goccia di Carnia a son cussì fuartis che a anulin ducj i efiets dal bevarin: il Friûl al è salf. Joker al finìs ai lavôrs sfuarçâts (piês di une condane a muart, par un triestin), e Gnotul-man, aplaudît di dut il Friûl, al regale ae polizie un Gnotul-segnâl, par che lu clamin cuant che ur covente: “Baste pontâ la lûs tal cîl e chest imprest al proiete une forme che mi clame subit!”
“Un gnotul?”, al dîs il poliziot.
“Biele idee, ma no: o pensavi a un muset e a un spritz”.
Sigle finâl: ta-da-da-da-da-da, ta-da-da-da-da-da-da-da-da-da, Gnotul-maaaan! ❚
Bete di Spere

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +