La nestre organizazion aministrative e à lidrîs fondis. Seconde part

Sul principi dal secont mileni la situazion teritoriâl – politiche dal nord est de Italie che nus interesse  e pues jessi presentade in struc su di une cjarte là che e je marcade la influence dal mont bizantin. Par dîle in curt une usme des diferencis che a esistevin fra l’imperi roman di orient e chel di ocident. Si trate di areis su la cueste dal mâr adriatic che a cjapin dentri la lagune di Vignesie, chê di Grau e la coste de Istrie, insumis  areis margjinâls pal Sacri Roman imperi cussì saldementri peât a la tiere ferme. Dal rest ancje i Langobarts, che par vie che a jerin cetancj e cun cussience di gjarnazie si pues ben dî che lôr a forin il grup  plui popolôs di int tal Friûl daspò de fin dal Imperi Roman di soreli a mont, no verin masse passion pal mâr. E su la tiere ferme dongje a ce che al restave de antighe presince romane si podevin cjatâ ancje piçui grups di ints poiadis  in conseguence dal sfantâsi dal imperi o puartadis da migrazions e invasions.
In cheste marche popolade di ints svariadis, cun interès, tradizions e civiltâts ancje lontanis, al nas il Patriarcjât di Aquilee sicu principât autonom inte suaze dal gnûf Sacri roman Imperi.  Nol è un câs che l’embleme storic de Patrie dal Friûl al mostre : “Donna con abito sontuoso et vario” e al spieghe “a dire de la diversa qualità de’ Signori di che questa provincia è abitata”. Il stât patriarcjâl nol jere ereditari e chest al rindeve secondarie ogni mire di espansion teritoriâl. Par uns doi secui, dal 1077 al 1251, i patriarcjis a forin todescs e il mont gjermanic al fo di esempli e pont di riferiment pal Patriarcjât di Aquilee. Lis lenghis des Gjermaniis si doprilis tai grancj e piçui palaçs dal guvier mintri che il latin classic al continue a jessi la lenghe de scuele, de int studiade e pal plui, dal scrivi.  I predis a van indenant cul latinorum dai lôr libris. E il popul? Il popul al cree, dute par se, la lenghe furlane davuelzint Il “sermo rusticus” aquileiês in maniere autonome e particolâr tant che intun codiç dal ≈1250, che si lu cjate in vatican, al è scrit cussi: “Forum Julii est provincia per se, distincta ab aliis provincis prenominatis quia nec latinam linguam habet, nec sclavicam, neque theutonicam, sed ydioma proprium habet nulli italico ydiomati consimile” (Il Friûl al è une provincie par so cont, diferente des altris provinciis za nomenadis parcè che nol à la lenghe latine, ni chê slave ni chê todescje ma al à une fevelade proprie che no je simile a nissune altre fevelade taliane).   Al guvier de Patrie, sicu Stât, il Patriarcje cul Parlament; a la aministrazion dal teritori lis Viciniis. Il parlament al è formât des rapresentancis dal clericât, de nobiltât e, prin in Europe, ancje des citadinancis intant che lis Viciniis a son inlidrisadis sul teritori. Cemût podevie stâ adun une tâl sfilze di realtâts? I principis di fonde a jerin pôcs e clârs par ducj mintri che il nivel des Viciniis al podeve tignî cont di ints e esigjencis diferentis. Tornant al embleme de patrie si lei ancje: Donna.. “posata ad una grande e feconda vite”  e al spieghe “a dire che vi sono vini di grande ricchezza”; vêr ma no stin a dismenteâsi che la vît e je un grant simbul dal cristianisim e che in ogni cjase furlane si plantave une vît dongje de puarte.
A Vignesie, il 9 di setembar dal 1420, tal senât de serenissime si  proclamave: “Quello che abbiamo fatto contro la Patria del Friuli, lo abbiamo fatto soltanto per assicurare il nostro Stato” e si zontave: “non in odio di qualche Chiesa né per ambizioni di maggiore stato, ma solo per difesa del nostro Stato abbiamo sottomesso la Patria del Friuli”.
Che la sumission e ves lis carateristichis de dominazion si lu viôt a clâr confrontant cul origjinari il gnûf embleme de Patrie dal Friûl frescjât sul sufit dal salon dal parlament tal cjastiel di Udin tornât a fâ su dai venezians passâts i taramots  dal prin 1500. La femine che cumò e rapresente la patrie no à plui ni dispostece ni dignitât, ogni simbul di podê e di culture al è tes mans des figuris alegorichis de serenissime. Di fat si formà une gnove stratificazion: culture alte e culture vîl, sore lis trombis de glorie, sot la cosse dai prodots agricui. Sorestants e sot stants e ben si intint che chei che di prin a vivevin in Friûl a jerin avodâts a jessi sot-stants.
Il Parlament nol fo sierât, al bastave svuedâlu  di podê. Lis Viciniis a restarin pal cuarp bas dal teritori za che Vignesie, citât-Stât “da mâr”,  e tignive in cont la tiere ferme nome par ce che e podeve dâ. A chês ints cussì pôc preseadis ur restave il valôr identitari de lôr lenghe furlane.
La bissebove napoleoniche  e savoltà dut il mont european, la serenissime, il parlament de Patrie e ancje lis Viciniis a forin sostituidis da comunitâts. Cul grant frêt e la cjaristie dal 1816 –17 al  tacave ancje pes  ints furlanis  il timp dal “libars di scugnî lâ”. Cui che al jere salt e al veve avonde fuarce al si puartave daûr: valôrs di fede cristiane, lenghe furlane, concretece di vite e voie di lavorâ.           Dal secul apene passât o dîs che al baste pensâ che i valôrs soredits nus àn judât a vignî fûr des sdrumadis di dôs grandis vueris e des maseriis di un taramot.
Prin di tornâ a sierâ  in scjaipe i miei pensîrs ur lassi fâ un ultin svol. Cemût mai che nô ducj si saludin cul “mandi” e si declarìn prin furlans e podopo braurôs dal nestri paisut cu la sô variante di lengaç? Cemût  isal che dal forest nus viodin come un grup sierât intune uniche etnie  mintri che o vignìn fûr dal miscliç di cetantis razis? Il sproc “fasìn di bessôi” isal di ridi o pluitost di capîlu tant che la voie di jessi protagoniscj dal propri futûr intune forme di federalisim progressîf?
Ocjo che ancje chei che a vivin tai Stât Unîts de Americhe a cjantin ducj “born in the U.S.A.” ancje se a son di etniis, stâts, lenghis, usancis e colôr di piel diferentis. Dutis chês ints a stan insieme parcè che a spartissin i valôrs di fonde, pôcs e clârs, intant che a rispietin lis identitâts  di ognidune par dut il rest.
E i valôrs de Europe?  Pôre ancje a ricuardâ lis lidrîs cristianis, figurìnsi a stabilî principis clârs e leçs di fonde semplicis che ducj a puedin capî, sintî e rispietâ. Miôr incjocâsi di normis e  regolaments  fint a lis aìnis che cussì ogni stât monolitic di riunde dal votcent  al pues interpretâlis a so comut no cate i principis. ❚
✒ G.S.P.