Sfuei Mensîl Furlan Indipendent
Archivi de Patrie

AGRICOLTURE. Sclesis di culture materiâl

............

Interviste cun Lucio Peressi che nus spieghe al sô ultime vore
Al è jessût l’an passât (viôt La Patrie dal Friûl di Otubar 2011) pes edizions de Societât Filologjiche Furlane un libri diferent di chei che si viodin pal plui in librarie “Sclesis di culture materiâl” cul sottitul “Aspetti del lavoro e della vita tradizionale in Friuli”. Si trate di un volum che al presente aspiets di un mont che al comparive, fin pocjis desenis di agns indaûr, consuetudinari e che invezit al comparìs arcadic. O vin domandât al autôr Lucio Peressi, studiôs di etnografie, cualchi sclariment sul so lavôr.
Scomencìn propit dal titul: cuâl isal il significât di “Sclesis”?
O ai intindût clamâ “sclesis” lis descrizions curtis di imprescj e moments di lavôr tradizionâl, presentant, dongje ae rapresentazion grafiche o fotografiche (si contin sù par jù 180 ilustrazions), cualchi note sul ûs dal obiet, su la nomenclature e sul contor antropologjic.
Par vie di cuale motivazion la dople intitulazion par furlan e par talian?
Lis nomenclaturis e i mûts di dî a son ripuartâts te lenghe origjinâl di ûs, invezit lis descrizions a son palesadis par talian. Un tant par rindi plui ladine, ancje a chei che no pratichin il furlan, la cognossince di chest particolâr aspiet de nestre culture.
Cuale ise stade la finalitât di cheste opare?
No volarès comparî presuntuôs pal intindiment di davuelzi une dople funzion: ufrî une pratiche e sclete “vuide” par une visite intun museu etnografic (no si trate di une opare sientifiche), ma ancje, pai plui atents letôrs, proponi un invît a scuvierzi i fuarts leams che lis personis dai paîs e, parcè no, dai borc citadins a sintivin cui imprescj di lavôr, cu la nature e cul Creatôr.
In ce maniere si palesavial il leam dal contadin o dal artesan cui siei imprescj?
In svareâts mûts: traviers de ricercje scrupulose dai argagns plui rispuindints aes sôs esigjencis di lavôr (in tancj câs il praticant al jere ancje un fabricant), traviers la “personalizazion” dai obiets e la modalitât di ûs (stant la lôr durade) e traviers la pussibile riutilizazion magari par une altre funzion (chest a diference dal scjadenât consumisim di vuê, che al compuarte il “dopre e bute vie”).
E il rispiet pal ambient cemût si pandevial?
Midiant de utilizazion savinte des zonis plui di sest par mantignî lis particolaritâts e lis varietâts dal teritori (cence straçâ teren), midiant de modificazion graduâl dal sestament zonâl e cu la atenzion cussienziose dai puartaments naturâi de vite des plantis e dai nemâi.
Traviers di cuâi segnâi il contadin dimostravial il sintiment religjôs?
Traviers modalitâts esteriôrs e interiôrs. Carlo Sgorlon al à vût segnât intune des ultimis memoriis “La persone che si met a contat cu la nature, la tiere mari, nol pues no provâ un sintiment di profonde sacralitât”. La popolazion contadine lu pandeve, par esempli, cu la costruzion di gleseutis o di anconis in sîts ben in evidence, cu la sacralizazion dai cjamps midiant des rogazions e po cui riferiments religjôs tai proverbis e tai siei intervents seont un calendari “santoriâl” e cun di plui cu lis invocazions.
In conclusion: il so libri puedial jessi considerât ancje come “opare di riflession”?
Lu speri, stant che pal gno mistîr di insegnant,o soi puartât a davuelzi une ativitât di informazion e di formazion, ma il libri al vûl jessi un mût par esprimi il gno rispiet viers un stîl di vite che al è stât tal timp pôc preseât. ■
Redazion

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +