Sfuei Mensîl Furlan Indipendent
Archivi de Patrie

________________

............

No volìn tornâ a jessi la “Sentinele di Italie”

✽✽ No son mancjadis in chest mês lis manifestazions in ricuart dai muarts de grande vuere. Cul rivâ de Italie, ae imagjin cognossude di “ostarie e cjampanili” che e definive i paîs furlans, al bisugnave zontâ ancje la presince di un monument che al ricuardàs i muarts in chê vuere che la propagande fassiste e varès inzigantît tant che completament dal Risorziment, e po dopo doprât tant che rimpin ideologjic de “vitorie mutilade”. Nissun sintiment ostîl, pal amôr di Diu, pal sacrifici di chei zovins colâts sul front, ma cul stes rispiet di chei furlans che a àn dade la vite sul front opuest. E ancje sul adietîf “opuest” e larès rispietade la veretât storiche.

✽✽ Cheste bataie cuintri de retoriche nazionaliste che e unìs diestre e çampe, cussì servîl denant de esaltazion acritiche dal Risorziment, le vin combatude e – se no vinçude – o vin almancul impedît che e passàs in mût cuviert, cui bêçs de regjon, a fâ di mîl: a volevin fanfaris e grancasse, ma dispès si son vûts di contentâ di trombetis e di tamburei.

✽✽ Dut câs, i erêts nostalgjics dal nazionalisim talian no molin il vues, e i segnâi di gnovis provocazions si son za concretizâts. La esaltazion de imprese di Flum, de figure di Gabriele D’Annunzio e je stade forsit la prove di cemût che a vuelin movisi in futûr.

✽✽ No si trate di criticâ cui che, di storic ma ancje di politic, si môf par interogâsi in maniere no dogmatiche su ce che al è sucedût in chei mês intal Cuarnâr. O crôt che al sedi interessant aprofondî ce che al à sburtât inteletuâi e veterans a lâi daûr al poete, cualis che a fossin lis frustrazions e lis aspirazions, i contignûts sociâi di chê esperience, se pardabon e je stade anticipadore dal fassisim o se invezit Mussolini al à capît, a diference de çampe, e al à doprât cierts archetips danunzians par propagande pure. Insume, un argoment interessant ancje daûr di un mût di proponisi aes massis che vuê al cjate rispueste in ategjaments e argoments cjârs a un leader tant che Salvini.

Une robe però al è studiâ un fenomen, une altre al è strumentalizâlu par finalitâts diferentis.

✽✽ Nol è un câs che propit esponents de Lega si sedin distints in cheste esaltazion de imprese di Flum, un teme che al Carroccio federalist no i sarès mai passât pal cjâf. Nol è un câs che un fat storic, cjaval di bataie dai neofassiscj in particolâr a Triest, al deventi vuê patrimoni salvinian, cun consecuencis pericolosis pal Friûl.

✽✽ Daûr di cheste esaltazion, di fat, al torne a agjitâsi il pinsîr – par altri mai scuindût intai ambients di chel che al jere l’Msi e ancje dai esui julians dalmatis – che chês tieris a puedin tornâ ae Italie. Si visaiso lis manifestazions di place cuintri dal tratât di Osimo? O fasaressin ben a no dismenteâsi che intai ambients de diestre nazionaliste chest progjet nol è mai stât abandonât e al reste intal lôr Dna.

✽✽ Se dut chest al restàs dome inte sede di cualchi associazion, in cualchi cunvigne di veterans, nol sarès un grant pinsîr; ma cuant che chescj concets a deventin patrimoni di une fuarce politiche che e intint – e che e pues vê i numars par fâlu – guviernâ il paîs, al Friûl i àn di sivilâ lis orelis.

✽✽ Intant parcè che o la nestre regjon e je dentri a plen titul in Europe, o e je destinade a no vê nissune prospetive. Metisi intune prospetive di revanchisim viers de Slovenie e de Cravuazie al va cuintri cheste ipotesi. In secont lûc, parcè che i furlans no àn mai vût nissun interès a oponisi ai popui dongje, nancje cuant che lis ideologjiis a metevin curtinis di fier ai confins. Anzit, propit la diplomazie di cheste regjon, viôt Alpeadria, e à metût lis basis di un futûr diviers cun Slovenie e Carinzie.

✽✽ E al è ancje alc altri, forsit mancul scjassôs ma par nô autonomiscj ancjemò plui impuartant: il disvilup di un pinsîr furlanist nol pues nassi o lâ indevant intosseât o intorgulît di elements antislâfs. In passât, chest al è sucedût e la furlanetât e je stade viodude e proponude tant che baluart di italianitât: il Friûl sentinele di Italie.

Il risultât al è stât chel “Piçule Patrie” che ancjemò vuê al ven doprât par dineâ la nestre vere e uniche identitât. La mari e je une sole, e si clame Friûl. ❚

Dree Valcic

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +