INTERNAZIONÂL. Visc, tragjicomedie di un scandul

Fevelant tal mês di Mai, sul palc dal ricuart di Nordhausen in Sassonie, Boris Pahor, internât tal cjamp nazist di Dora, che al ufrît materiâl uman pes V1 e V2, al disè «O speri… che cheste iniziative e podedi jessi un incentîf pe istituzion di un memoriâl a Visc, in Friûl, dulà che a forin sieradis 4000 personis puartadis des Slovenie, Cravuazie, Serbie, Montneri…».
Pahor al à ricuardât che la Sorintindince e à vincolât buine part dal Lager e si è augurât che «Oltri che chest proviodiment just (il vincul, ndr), il cjamp di Visc al podarès deventâ un Centri di memorie, dulà meti adun la documentazion dai plui impuartants cjamps fassiscj par meti in vore un progjet a nivel internazionâl».
Il President Napolitano al è stât in Slovenie; il President Türk, intune interviste a Triest al à fevelât de necessitât di memorie: il coordinatôr de associazion di Visc “Tieri di Confin”, Ferruccio Tassin comentant l’intervent di Pahor al declare «I doi Presidents che a vignedin a Visc e a viodaran l’unic cjamp fassist inmò intat in Italie, vincolât de Sorintindince, tignût in maniere incivîl, te sperance che al scomparissi e che al vegni gjavât il vincul. Che a vignedin a Visc, puest di confin par 5 secui, cun vocazion al incuintri e che cumò al è scandul internazionâl!» ■
Redazion