Sfuei Mensîl Furlan Indipendent
Archivi de Patrie

GRIGNEI DI STORIE. Il misteri dai Mosaics

............

Cuant che tal 1909 i archeolics a gjavarin fûr il paviment de Basiliche dal Patriarcje Popon a restarin cence peraulis: sot dai lôr voi si sparniçave il plui grant mosaic de prime cristianitât in Europe, vuê declarât de UNESCO patrimoni di dute la Umanitât. Inizialmentri datât al 308 de ete moderne par vie di une scrite che e ricuarde il Vescul Teodorì, i studiôs a son cumò pronts a pensâ che al sedi ancjemò plui antîc. I lavôrs a continuarin fintremai tal 1912 e a puartarin ae lûs dîs tapêts di tessaris coloradis che a formin un insieme pardabon straordenari, là che intun mâr labirintic popolât di pes grancj e piçui, a nadin figuris misteriosis che nus contin, a distance di cuasi doi mil agns, la grande aventure de Glesie Mari, il so Symbolum, ven a stâi il Credo.
LA “DUTRINE” AQUILEIESE_ E a contin ancje chê gramatiche speciâl fate di segns, simbui, figuris, interpretade tai agns plui dongje di nô di bande di studiôs nostrans de tempare di Renato Iacumin (che masse adore nus à bandonâts par lâ a cirî tal abìs de Eternitât i segrets di chei mosaics che al veve studiâts par dute la vite), o ancjemò di pre Gilberto Pressacco, cu lis sôs sugjestions peadis ae simbologjie dal profete Jone; fintremai al dì di vuê, cu la scuele di Remo Cacitti e il so arlêf, Gabriele Pellizari, che al dimostre tai siei studis che segns e dissens a vevin un compit cetant plui impuartant che no la estetiche e la decorazion: a sintetizavin un messaç, a contavin cu lis figuris ce che un dai libris plui impuartants de Glesie antighe, ven a stâi “Il Pastôr” di Erma, al significave cu lis peraulis e par latin. Il mosaic duncje come gramatiche di chei che no son dotôrs o sorestants, che no puedin ni lei ni scrivi ma si svicinin ae Fede dai Paris in gracie di un lengaç universâl, di une potence uniche e straordenarie, imbastît di mans che a savevin tratâ la piere parcè che si jerin formadis cui cai dal lavôr dûr, chel che al santifiche, secont la lezion antighe, la vite dal Om. Il Popul dai no studiâts al scriveve cul scarpel e cul martiel su sfueis eternis, destinâts a lassâ il segn, grandissim, di une Civiltât che si fâs lidrîs dal nestri vivi di ogni dì.
MOSAICISCJ MODERNIS_ Cheste art straordenarie – che si sfrancjave sot dai puiûi tal caligo dal Istât, o in piçui laboratoris tal lunc Invier, tra lis monts di Clausêt o dal Cjampon, sui crets di Forgjarie e di Vît dai Asins, o fra i clapats dal Tiliment, di Denemonç a Dignan – e je restade come polvar fra i dêts ancje di chei operaris che a lavorarin tal principi dal Nûfcent tes profonditâts des Americhis, o tal “Far East” de Russie, fintremai in Siberie, clamâts par ogni bande dal Mont par meti une firme furlane, colorade e buine di fâ nassi maravee, al lavôr di une migrance che pareve no vê mai fin. Cussì a Vladivostok, la stazion plui estreme e orientâl de Transiberiane, Giramondo Toniutti (ce non par un destin), scarpelin di Ruvigne, al à firmât, di cualchi bande, il mosaic che miârs di pîts a àn pescjât, cuasi a ricuardâ che la vite si disgrope par trois impensabii, stant che ognidun di nô al sa ben là che al è nassût, ma nol savarà mai là che al larà a murî.
NOVANTE AGNS DI SCUELE_ A Spilimberc, la prestigjose scuele par Mosaiciscj chest an e celebre il so novantesim inovâl. Cuasi un secul di ativitât là che si è vuadagnade, ore presint, une fame straordenarie. Interessante cumbinazion: tal stes an che il regjim fassist al imponeve in Italie une patriotiche e mostruose uniformitât di colôr, chi di nô si vierzeve une scuele là che si insegnave, al contrari, che la difarence, la pluralitât, la cumbinazion, il confrontâsi a son la vere bielece dal mont.
L’INSEGNAMENT DE DIVIERSITÂT_ Tessaris dutis compagnis no fasin nassi ni vivi nissune figure. Il contrast, la identitât buine di dialogâ cun ducj chei altris e je la rispueste destinade a vinci, come che al diseve dispès ancje pre Checo, sostignint la identitât Furlane. Un biel insegnament, une metafore straordenarie de vite. Ogni an la scuele dai Mosaiciscj dal Friûl e vierç lis sôs puartis a students di ogni nazion: Americhe, Russie, Cine, Afriche, Australie… E i lavôrs che a jessin fûr dai lôr laboratoris si puedin amirâ pardut, di New York a Sidney, di Mosca a Atene. Ancjemò une volte, vuê come îr, tessaris furlanis a viazin ator pal Mont. Sclesis di pâs, culture e sperance: che finalmentri la Umanitât e puedi capî il valôr di une concuardie universâl fondade sul rispiet de diference. Vuê come ai timps dal Vescul Teodorì, in Acuilee. ■
ANGELO FLORAMO
_____________________

Tessare su tessare

Sclesis di madrepore, caputis, piçulis pierutis coloradis, conis di crete cu la base smaltade fracâts inte malte frescje di une parêt: la man che ju met adun e lavore sot dal cîl di Ur, in Mesopotamie, 3.000 agns prime di Crist. Il prin mosaic de storie. Egjizians e Grêcs a perfezionarin la tecniche, doprant prime claputs e po dopo tessaris minudis e regolârs, che duncje a podevin jessi unidis plui facilmentri tal profîl di un dissen. Il non “mosaic”, invezit, al ven di “musaic”, ven a stâi il rivestiment de “grote des Musis”, la part de cjase romane sgjavade intal cret, là che e jere une risultive di aghe frede o cjalde, doprade pai bagns e pes abluzions: lis parêts a jerin taponadis cu lis tessaris coloradis sedi par dâ un biel efiet artistic sedi par arzinâ la umiditât dal lûc. Un zûc di sfumaduris, dissens gjeometrics, labirints di liniis che si intortein une parsore di chê altre, e po dopo senis di cjace, balets, nemâi, une vegjetazion che si slargje intun moviment a sarpint a incornisâ un tapêt di maraveis. Bizantins e araps a fasaran proprie cheste art, puartantle al massim grât di sflandôr, stant che ur permeteve di celebrâ il non di Diu cence bisugne di rapresentâlu, juste come segn di sacralitât e di bielece. Aquilee cristiane si fâs interprete di dut chest sprofont di secui, e fondant il so magjisteri su la combinazion e il dialic, plui che su la cuintriposizion, e torne a lei e a interpretâ la art antighe dal mosaic cuntun lengaç gnûf, cuasi une forme di comunicazion rinovade, plene di valôrs simbolics e di sugjestions che a restarin tai secui di semence jenfri il sanc, la cjar e il respîr dai abitants de Patrie, cussì dongje al lor mût di sintî e di jessi, se e je vere che i furlans a àn simpri sorestât propit tal mistîr di mosaiciscj, famôs e preseâts in dut il mont pe lôr abilitât tal taiâ lis pieris e tornâ a componilis in figuris. Forsit parcè che la lezion leade al mosaic nus insegne che ogni piçule tessare, ancje la plui umile e grise, e pues dâ il so contribût par regalâ lûs al cuadri intîr. No someial un precet furlan? ■
ANGELO FLORAMO

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +