TV FRIÛL E CJANÇONS. Ce ti metistu intor?

Masse facil insegnâ a vistîsi a un milanês, vignût sù fin di cuant che al jere piçul a pan e sfiladis. Ma vêso fat câs che te famose trasmission “Ma come ti vesti?” no si viôt mai un furlan?
Par chel, e je nassude finalmentri “Ce ti metistu intor?”, la prime trasmission par insegnâ ai furlans a vistîsi cun stîl. A difarence de trasmission taliane, no son i amîs a segnalâ i concorints (figurìnsi se un furlan al met il bec tai vistîts di chei altris!). A saran duncje  i condutôrs a cirîju, ator pal Friûl.
Une volte puartât il concorint tal studi, i condutôrs i consearan trê mûts di vistîsi difarents: par vie pal dì, pe sere e pes ocasion speciâls. Cuale ise la difarence cu la trasmission taliane, alore? – mi domandarês voaltris.
Ben, prime di dut, il vistît par vie pal dì, par un furlan, al è un vistît di vore (ce altri si puedial fâ, di dì?). Duncje, come prime robe, il concorint al varà di sielzi un grumâl, une tute, un elmet o alc altri, daûr dal mistîr. E fin chi, e je facile: chê prove chi le passin in pratiche ducj. Ai furlans ur plâs vistîsi par lâ a vore e su chel no falin mai: stant che contâ balis al è fûr dal lôr caratar, nissun al met sù un cjamesot di miedi se al fâs l’idraulic (sedi idraulic che miedi, però, a metin sù ancje i vistîs di contadin, parcè che almancul un tic di ort lu àn ducj). La prove plui dificil, pai concorints furlans, e je chê di gjavâju, i vistîts di vore. E di convinciju che la sere si pues fâ altri, par esempli divertîsi.
I vistîts di sere, di fat, a son la vere sfide de trasmission. No che il furlan nol vedi bon gust, ma il sens pratic al ven simpri prime dal sens estetic. Il furlan, di fat, nol bute vie nuie, e tal armâr e je simpri une bluse dai agns otante o un bregon di prime ancjemò. Di dutis lis leçs de mode, il furlan al à miôr chê che e dîs che prime o dopo dut al torne di mode. E si à fat fieste, in Friûl, cuant che a son tornâts a lâ i “fuseaux” (cumò si clamin “leggings”, ma tant une volte intor nissun al capìs se a fevelin inglês o francês).
Ce mancjal? Ah sì, la tierce prove: i vistîts des ocasions speciâls. Po ben, nol covente jessi esperts: baste sielzi il blanc e il neri. Che la ocasion speciâl e sedi une cerimonie o une partide di Champions League, al va ben distès.
Il plui grant probleme de trasmission, però, al è chel di comprâsi i vistîts. Te version taliane, i condutôrs a dan in man al concorint une cjarte di credit di 1.500 euros di spindi cemût che a vuelin. E in Friûl? A àn provât a fâ compagn ancje a “Ce ti metistu intor?”, ma no je lade ben: il concorint furlan al à cjapât i bêçs e ju à metûts ducj vie in bancje.  ■
BETE DI SPERE