IL FERÂL. Ce frico cun chel Zico

Ancje chest an l’Udin al è rivât a fâ un bon campionât di balon, cun grande sodisfazion di tancj sportîfs furlans. Cence gjavâ nuie ai passionâts, al è just ancje fâ cualchi resonament che nus puarti a problemis plui sostanziâi. In chest pre Antoni nol pierdeve ocasion. Cualchi probleme di 30 agns indaûr al è superât, altris a son ancjemò in dute la lôr crudece e dramaticitât: puescj di vore, situazion economiche e finanziarie, rispiet e valorizazion de proprie identitât e culture, ricognossiment dai dirits naturâi cun leçs e struments in merit che a restin simpri congjelâts tai casselins dai sorestants.
pre Roman Michelotti
Che i furlans a vedin fate une figurone cul câs di Zico no mi sint, in cussiense, di dîlu. O sai che i sportîfs, zovins e carampans, mi disaran che dopodut ancje il sport al à la sô impuartance sicu vargule par scjariâsi dal convulç de vite moderne e sicu mieç par disgredeâ il vuluç dal timp libar.
O sai ancje che l’Udinês no jentre cui metalmecanics e che i fastidis dai taramotâts a restin ancje se Zico nol passe il poç.
Ce che no rivi a capî e je cheste vivarositât dai furlans par une cuistion di balon (lôr a disin che si trate di dignitât, ma che dopomai che nus e àn insoçade) e il sintî cheste int, di ogni ete e fate e divignince, a pierdi il cjaf daprûf di une cuistion cussì di seconde rie.
No vuei fâ il moralist pai bêçs, seben che strassâ miars di milions al è un pecjât di chei cu la code. Ce che no capìs e che no vuei acetâ al è che un popul intîr, cjamât di soldâts, di impiegâts e mestris e miedis e sorestants forescj, cun problemis di ocupazion grancj come monts, al dismentei dut e si discjadeni te plui grande manifestazion mai sucedude. Almancul misurant la confusion.
Alore mi ven di pensâ ai romans che a incjocavin la plebae cui zûcs dal circ par che no dopràs il çurviel. E di fat un popul cence culture nol à altre sortide fûr dal balon, des cjançonetis e di cualchi putaneç. Ma un popul cence culture al è ancje un popul cence avignî, sint un popul di pipinots tes mans di chei altris. E cheste e je dure di glotile.
Come che e je dure di sintî une int a ribelâsi par une sentence di balon, ancje no juste, e tasê e sopuartâ e no scomponisi denant di injustiziis che a àn sanganade la storie di îr e di vuê. Bastarès pensâ che no sin parons di nuie: ni de tiere, ni de scuele, ni dai puescj di comant, ni di chei di lavôr, ni de lenghe ni tant mancul dal nestri avignî.
E viodi i onorevui, di ce cu sedi partît, ducj par un fîl a cori jù a Rome a domandâ udience.
Cuant mai ano vude cheste armonie? Veramentri a jerin par un fîl ancje ai timps de unitât regjonâl, te universitât, tal taramot. Unîts tal freânus.
Te amarece, e grande, di cheste canicule che ti gafe cuarp e anime, une consolazion: che cumò, par dîle cun Pup, i politics a scugnaran là dacordo ancje tes robis plui impuartantis, cence nissun rimpin, e che i furlans, cumò che a san berghelâ, a varan di fâlu simpri. E nissun nol podarà dâur dal cjampanilist o dal cjastron.
E come che a domandin par gjoldi il timp libar, a savaran batisi ancje pal timp di vore e pal puest. Cualchidun, che prime si sintive talianon, cumò al à voltadis lis spalis a la “patrie”, deventade madrigne e musse, e al à tacât a pensâ che jessi furlans e talians no je propit la stesse mignestre. Che anzit al sarès il câs di cjalâ ogni tant par in sù. Po no vevino scrit “O Zico o Austria”? Nancje chest. dopo sucedût, nol sarès mâl. Come che nol è mâl lei, sul Giornale dai 11 di lui, une letare firmade di 25 di lôr, di san Vit al Tiliment. I rispuindin a Pastore disint che i furlans a vevin dome la idee di notâ la scuarde tal campionât austriac e no, come che al veve capit malamentri lui, di passâ sot l’Austrie “perché quest’ultima soluzione sarebbe un regalo troppo bello e gradito per la maggior parte dei friulani”. Sun chest no soi dacordo. Che la Italie e sedi par nô une disgracie lu palpe ogni furlan cuntun sbit di sintiment e di voli, ma che i furlans a vedin gole di lâ sot di un altri paron, no crôt. Parons mancul a ‘nd è e miei al è.
Se duncje, cu la cuistion di Zico, i furlans a àn tacat a capî che no son dome di serie “B” ma che no son nuie, dome vacjis di molzi e mus di fâ lavorâ, si podarès ancje parâ jù cheste brute pagjine scrite dal popul furlan. Cui pîts.  ■
pre ANTONI BELINE
La Patrie dal Friûl, n. 7-8 lui-avost 1983)