GRIGNEI DI STORIE. Une culture cressude modon su modon

Meti lis mans te cree e je une esperience sensoriâl totâl. Une gjonde arcaiche, anzit no, di plui, ancestrâl. Tal prin moment ti somee di sporcjâti, di impantanâti fin tal comedon. La “culture” e prevâl ancjemò su la “nature”, e tu as pôre di fâ cualchi dam. Come un frut che al zuie cul paltan e di un moment a di chel altri al spiete la vosade de mari. Ma subit dopo, la sensazion e gambie. La nature e tache a vinci cul so leam cu la Antighe Mari, e si sint un grant plasê a slichignâsi, specie cuant che la lacje e jentre cul so paltaniç, umide e clipe, jenfri i dêts. E cuant che la materie si fâs plui penze, alore al sucêt un piçul meracul: la tô man e devente buine di regalâ une forme, un profîl, une anime a ce che prime al jere dome un scliç di arzile: un plat, un vâs, une anfore, un pipinot o un modon. Straordenarie la assonance cu la flôr dal pan. Pan e Modon a nassin insieme. A son fradis, zimui. A vegnin impastâts cu lis mans dal om. E cul so sudôr. Cuets intun for. A tegnin tal cûr ducj e cuatri i elements dal mont: la aghe, la tiere, il fûc, l’aiar. Pan e Modon a fasin la anime de Cjase, il so profum, il so colôr. Il so calôr. A disegnin la sigurece de protezion e de abondance.
POLEÂ MESOPOTAMIC_ Plui di cuatri mil agns fa, si pense che i prins impascj di cree, paie e aghe a vedin preparât il prin modon de storie, in Mesopotamie, e plui precisementri a Ur, forsit la citât plui antighe dal mont, tirade sù dai Caldeos, propite dongje la bocje dal Tigri e dal Eufrate. E di li, la tecniche si sarès difondude vie pal Orient, in Egjit, a Crete (un non che al è dut un program), in Grecie e vie indevant. In dutis lis mitologjiis antighis, si cjate un Diu che al impaste il Mont zuiant cu la cree. Ancje par chest, la vôs “creâ” e ven di chel stes significât. La lenghe furlane – no mi pâr che a setin altris lenghis a vê mantignude la stesse etimologjie antighissime – e conserve su chest cont une vôs bielissime: “poleâ”, ven a stâi doprâ il “poleâr” par dâ une forme, par inspirâ une anime a la cree che pôc prime e someave muarte e cumò e cjape vite. E di li a dut ce che e compuarte une azion peade al fâ, al costruî, al modelâ cu la sapience des mans e dai siei dêts. Te nestre storie di popul, o sin stâts famôs e ricercjâts lavoradôrs ator pal mont par cheste sapience dute inteletuâl che si impaste insieme cu la fadie des mans.
BINOMI NATURE E CULTURE_ Propite li, la Nature si incuintre cu la Culture, sdrumant chê stupide contraposizion fra il lavôr manuâl e chel inteletuâl, une invenzion dai sorestants che a volevin dome comandâ cence lavorâ, progjetâ e no sporcjâsi lis mans. I fornasârs furlans dal Votcent e dal Nûfcent a jerin clamâts in dut il mont par pandi la lôr sapience tal fâ “scudielis, planelis o modons”, come che si cjante cu la malinconie de vilote. E no je stade dome une storie di fam, di migrazion, di sfrutament e di miserie di bintars sledrosâts dal mâl di un vivi disperât e zingar. Sigûr ancje chê, pe durece dal lavôr che dispès al obleave ancje i fruts a bandonâ la famee e lâi daûr a un capocjat che ju sfinive e ju consumave di berladis e di pidadis e di blestemis, a un ritmi di produzion disumane e bestiâl. Che plui di cualchi volte ju à copâts. Ma in chel cjamp alì, i Furlans a àn ancjemò une volte dimostrade une passion cuasi religjose pal lavôr fat ben, inmaneât su di une tecniche cetant inovative pe tecnologjie doprade, reclamade pardut come esempli di modernitât e di braure. Come che a àn dimostrât l’an passât chei bulos dal circul culturâl “El Tomat” di Buie intune mostre memorabile, ven a stâi “Uomini, macchine e argilla”, tirade sù come suaze pe presentazion dal biel e documentât lavôr di Laure Nicoloso e di Dree Cattarino “Fâ modon a Buie”. Un libri dut di gjoldi e di meditâ.
LAVÔR DI MAN, NOL È DI VILAN_ Par no fevelâ po des piçulis impresis artesanis di muredôrs e impresaris nostrans che in FrancIe o in Svuizare o in “Lussimpon” a àn tiradis sù cjasis, palaçs, paîs, fin al disastri dal taramot, cuant che ancjemò une volte la linfe dai modons ju à reclamâts indaûr a cjase lôr, regalant une sperance di rinassite ae nestre Tiere, cussì tant devastade e pierdude. E vuê o sin dentri intun altri Taramot, forsit plui preocupant di chel dal ‘76. I economiscj a disin che il segnâl plui evident di une crisi economiche si lu viôt propite te edilizie, se e je vivarose o ferme. Se no si domandin cjasis al è il segnâl che ancjemò no je riprese. Ma provait a zirâ pai nestris borcs, massime in perifarie. La betoniere tai curtîi e zire come la gorlete di une mari di famee puare che no pues puartâ il frut dal sartôr par comprâi un vistît gnûf, ma che e lavoruce di un continui su chel vecjo tant che al devente ancjemò plui biel di prime. Chel mâl antîc e nobil di fâ e di disfâ, di comedâ, di rangjâsi, chi di nô si lu lei ancje in dì di vuê, tal mieç di chest sdrondenament devastant de economie globâl, te tasse di modons tirade sù tra l’ort e il box dai imprescj. Dal sigûr, nol è il segnâl che o sin fûr dai fastidis. Chel no. Ma che o savìn rangjâsi cul pôc che si à, chel sì. Cirint di no pierdi mai la dignitât. La dignitât che e sporcje lis mans cu la cree, vuê come cuatri mil agns fa. Parcè che la Storie nus à insegnât, in cuintritindince universâl, che lavôr di man – chi di nô – nol è par nuie lavôr di vilan! ■
ANGELO FLORAMO