LA FABRICHE DAI… LIBRIS. La ristampe di Eutanasie di un Patriarcjât

La prime edizion di chest libri e je finide di lâ fûr di un pieç e plui di cualchidun al bramave di tornâ a vêle in man, cussì e je stade fate cu la gnove version, gambiade dome te grafiche e te presentazion, no tai contignûts.
I dissens di Gianni Di Lena, che di tant timp a caraterizin la grafiche da La Patrie, a fasin di suaze braurose ae ricercje storiche fate di pre Toni Beline tal 2001.
Une ricercje che no vûl jessi “la storie”, ma che e vûl contâ un toc di storie che pocjis voltis e je stade mostrade, ven a stâi cjalantle de nestre bande. Dut al partìs di cuant che tal 1751 pape Benedet XIV, la Republiche di Vignesie e la Regjine dal Imperi Austroongjarês Marie Taresie, a deciderin di fâ sparî 17 secui di storie. Un viaç te storie prime di chê date, par cjalâ lis dinamichis e lis resons – se cussì o volìn clamâlis – che a àn sburtât chei sorestants a decidi sul destin dal Patriarcjât milenari di Aquilee. Ancjetant impuartante e preseade e je la introduzion fate de professore Liliana Ferrari, docente ae Univiesitât di Triest te catedre di Storie de Glesie, che e met a fûc dut il contest storic di indulà che e partìs la descrizion di pre Toni. Un conta che al cjape par man il letôr e che lu sburte a pensâ fintremai e indulà che al sedi just messedâ politiche e pastorâl, culture e oportunisim. In fin, il lavôr di pre Toni al puarte une traduzion in furlan de bole papâl, Injucta nobis (chê che e met la peraule fin al patriarcjât) che e fâs capî avonde la volontât e lis motivazions uficiâls de glesie di chel timp tal volê sdrumâ la storie dal Patriarcjât di Aquilee.
Pre Toni al conclût, insom, cuntune provocazion che no pues no lassâ plui di cualchi domande, cuant che si dîs che murî par consunzion al pues jessi un fât normâl, ma che murî copâts nol lu è.
Il libri al fâs part de golaine Opera Omnia dedicade ae ristampe dai lavôrs di pre Toni, sostignude de Provincie di Udin. ■
Mauro Della Schiava