SPECIÂL – Mangjâ locâl, sparagnâ globâl

Come dutis lis modis ancje cheste e rive de Americhe: la 100-Mile Diet. Doi gjornaliscj di Vancouver, Alisa Smith e J. B. Mackinnon, a àn provât a cambiâ il lôr mût di mangjâ lant cuintri de globalizazion. Par un an si son nudrîts dome cun aliments fats no plui lontan di 160 chilometris di cjase lôr, pontant cussì sul locâl. Di indulà ise vignude fûr cheste idee? Te Americhe dal Nord (come te plui part dal mont industrializât), i prodots che a jemplin i plats de int a vegnin soredut di lontan e a fasin cussì tante strade prime di rivâ su lis taulis che nol è un ben ni pe salût dai consumadôrs ni pal lôr tacuin, stant che a pierdin la lôr frescjece e i coscj di traspuart a fasin lâ sù i presits.
COGNOSSI IL TERITORI_ Di chest lôr esperiment i doi canadês a contin sul blog  http://100milediet.org/ e tal lôr libri The 100 mile diet. Cjalant ancje i cambiaments di stagjon e di clime a cirin di educâ il citadin a sielzi la robe che e ven fate in maniere naturâl e che si pues comprâ ancje li che e je produsude. Chest al è cun di plui un mût par cognossi miôr il teritori e ce che chest al pues ufrî. Cumò al è dut un nassi di marcjâts e di consorzis di agricultôrs che si organizin par dâ al consumadôr prodots di cualitât, cence fâsi mancjâ lis scuelis che a insegnin ai cogos a preparâ ricetis locâls.
ORTS DI CITÂT_ Un cogo tal cûr di Londre al à inviât un ristorant li che al propon une mangjative dome londinese, cun pes, formadis, pomis, verduris e cjars produsudis dome dentri dai confins de metropoli. In cualchi zone di New York a son chei che a àn fat l’ort su la terace di cjase, chei che a àn metût i boçs pes âs parsore dal cuviert, o che a tirin sù gjalinis par dâur i ûfs a mieç cuartîr. Dificil crodi che la salate che e nas fûr dal barcon di chê metropoli e sedi miôr di chê che e cres tes campagnis, cjapìn però at che il mût di pensâ e lis abitudins alimentârs a tachin a cambiâ e che par frontâ la obesitât, grant probleme de societât dal benstâ, la cure miôr e je apont chê di mangjâ san. Che no nus vegnin a contâ però che lôr a àn inventât chest gnûf concet…Covential che nus al  insegnin i americans che la robe di cjase e je la miôr?
Elena Zanussi