ATUALITÂT – A son nassûts i furlans di doman

In pôc timp, al è stât metût adun un calendari di cuatri apontaments tematics su la storie dal Friûl, de Protostorie fintremai ai dîs plui dongje di nô.
Al è nassût cussì il Grup “Furlans di doman”. Un non che al è vignût fûr de cussience di vivi intune regjon che e je simpri stade tal mieç de Europe, une tiere peade ai grancj moviments migratoris des popolazions te antighitât come ai grancj acjadiments de storie plui resinte. Se no si cognossin la storie e lis tradizions, no si pues vê une plene cussience di ce che al sucêt in dì di vuê e no si pues pratindi di capî ad implen chei altris. Bisugne savê cui che si è, par capî dulà lâ e cuâl puest cjapâ tal mont. Chest al è il spirt dai “Furlans di doman”, un grup viert a ducj che al à volût dâ une “scjassade” tai mês de Sierade intal Friûl des Culins fevelant di storie de nestre tiere.
Vie pai incuintris, i relatôrs a àn doprât un lengaç divulgatîf propit par rivâ a fâsi capî di ducj e par dâ la pussibilitât al public di intervignî slargjant cussì i contignûts o lant plui sot in chei che la curiositât dal moment e sburtave a sclarî. Si è scomençât a Ruvigne, ai 30 di Setembar, cun Angelo Floramo che al à fevelât “Dai cjastelîrs aes stradis di Rome”. Po dopo, il viaç te storie al è lât indenant a S. Denêl cun Gianni Sergio Pascoli e “La Patrie dal Friûl jenfri Patriarcjât e dominazion veneziane”, a Rivis Darcjan cun pre Romano Michelotti e “La specialitât de Glesie di Aquilee”, par sierâsi ai 21 di Otubar a Vilegnove di S. Denêl cun Alberto Vidon e “Il Friûl di Napoleon ai dîs plui dongje di nô”. Lis seradis a son stadis fatis cul jutori di “Glesie Furlane” e “La Patrie dal Friûl”, cu la colaborazion de Regjon, cul patrocini de Provincie di Udin e dai Comuns che a àn ospitât i incuintris.
Intant, il grup al sta za pensant al 2012, al à za une direzion di pueste (furlansdidoman@gmail.com)
e un blog (furlansdidoman.blogspot.com).
Stefania Agostinis