ATUALITÂT – A Tresesin pal Congrès anuâl de Societât Filologjiche Furlane

La situazion dal furlan e je dificile: i bêçs a mancjin e lis robis no van indevant, ma la colpe din cui ise? Il Congrès numar 88 de Societât Filologjiche Furlane celebrât a Tresesin al à fat il pont su la situazion cuntune presince une vore fisse di protagoniscj de politiche nostrane: dal assessôr ae istruzion Roberto Molinaro al president dal consei regjonâl Maurizio Franz, dai presidents des Provincis di Udin e Gurize Pietro Fontanini e Enrico Gherghetta a plusôrs conseîrs regjonâi e provinciâi.
I INTERVENTS_ La conclusion di Molinaro, che par doi agns e mieç al à vude competence primarie sul furlan e al continue a vêle in materie di scuele, e je che «i ostacui a son tancj ma che i furlans no sburtin avonde par vê ce che al sarès un lôr dirit». Sotans, duncje: e contents di jessilu. Par chest no lìn in place e no batìn i pugns cuant che il regolament par insegnâ il furlan tes scuelis al reste fer ancjemò un an e cuant che la Rai no môf un claut par fâ trasmissions in marilenghe. Combatîf si è mostrât Fontanini, che al à scrit al sotsegretari ae presidence dal consei talian Paolo Bonaiuti par pandi dut il marum dai furlans pe disaplicazion dal contrat di servizi Rai, che al varès di tignî cont de minorance furlane ma no lu fâs par nuie.
Impuartant l’intervent di Gherghetta che al à peât il destin de lenghe furlane a chel de scuele di Migjee, dulà che par tignîle vierte al è stât propit doprât il fat che si trate di un istitût dulà che e je ancjemò fuarte la domande di insegnâ il furlan e par furlan. «Dal avignî che i tocjarà a chest plès scuelastic si capirà ce avignî che e varà ancje la marilenghe» al à dit, contant des resistencis dal aparât ministeriâl.
I OSPITS_ Il president de Filologjiche Lorenzo Pelizzo al à presentât adun cun Enos Costantini il numar unic dedicât a Tresesin in ocasion dal congrès che si è tignût culì par memoreâ lis figuris di Andreina e Luigi Ciceri, a trente agns de muart dal om. E par mostrâ ce oms di culture che Tresesin al pues regalâ ae culture furlane ancje in dì di vuê ur è tocjât ai scritôrs Alan Brusini e Pierluigi Cappello saludâ cun doi biei intervents i socis de Benemerite.
Walter Tomada