ATUALITÂT – No te perdonaRAI

Ae fin di Setembar al scomence la azion il Presidente de Provincie di Udin, on. Pieri Fontanini: une letare domandant un incuintri urgjent al on. Paolo Bonaiuti, sotsegretari di Stât ae Presidence dal Consei par sveltî i timps par firmâ la convenzion che e previôt la realizazion e la metude in onde di trasmissions radiofonichis in lenghe furlane su la Rai. Fontanini al domande almancul 240 mil euros pai coscj di realizazion e metude in onde di apontaments di informazion cuotidians (di lunis a vinars) par dut l’an. «La sede de Rai di Udin – al siere Fontanini – e varà di jessi potenziade te dotazion organiche e tes risorsis a disposizion».
Subit daûr un altri esponent de Leghe Nord, il sen. Mario Pittoni (di pôc nomenât dentri de Comission parlamentâr di vigjilance Rai) al anuncie la sô propueste par reperî finanziaments di investî tes trasmissions par furlan.
LA DIFIDE_ Ma il pas plui eclantant al rive a metât di Otubar, cuntune difide uficiâl firmade de Provincie, de Arcidiocesi, dal Comun di Udin, de Universitât dal Friûl e Societât Filologjiche Furlane. Promotôrs dal document il Comitât pe Autonomie pal Rilanç e de Codacons regjonâl che le àn mandade a la Presidence dal Consei dai ministris, ministeri dal Svilup economic e Rai par violazion dai dirits linguistics dai furlans fissâts dentri de Leç 482/99. Il pas seguitîf, tal câs che dentri di 3 mês no si vedi rispuestis a podaressin jessi azions legâls e domandis di risarciment dai dams.
Par intant al è miôr tignî lis orelis spiçadis, massime par cuant che si varà di decidi ce fâ a Zenâr, cuant che al rivarà il boletin, par scuedi a lis fameis la solite “gabele” par un servizi assent, almancul pal popul furlan: prin di paiâ al sarà di verificâ ce che la Rai e varà fat a pro de lenghe furlane.
Redazion