IL SIVILOT. Piês Gottardo o Fantozzi?

Tante ipocrisie e intant il Friûl al riscje di lâ a patràs

La ultime setemane di Otubar e je stade chê dal “affaire” Paolo Villaggio che al à riscjât la cuerele di bande dal President de Regjon Renzo Tondo. Come che ducj o savarês la cuistion si è sierade cu lis scusis e la amission di colpe di bande dal atôr di Gjenue pes frasis scritis sul cont dai furlans tal so ultin libri. Eh sì, cjâr il nestri “rasonîr” par antonomasie, cheste volte tu le âs fate fûr dal bocâl, ma disìnsi la veretât: nancje il miôr adet marketing al varès mai rivât a fâti tante publicitât.
Se e je vere che il dirit di satire nol varès mai di passâ il limit dal bon gust, forsit inmò plui “fantozian” però al è stât il “fûc incrosât” che si è discjadenât cuintri di un librut che probabilmentri nissun ca di cualchi setemane si sarès plui impensât. Di fat, ben piês nus somee la reazion ipocrite di tancj che, ancje dopo des scusis a àn continuât a atacâ par zornadis e zornadis, alçant plui polvaron di ce che forsit al coventave.
Cumò però o spietìn che a partissin cuerelis plui impuartantis e utilis: par esempli, cuintri dal gjestôr public pal servizi radiotelevisîf parcè che di agnorums nol met in vore la leç 482/99 pe programazion in lenghe furlane ancje se i Furlans a continuin a paiâ chel boletin che ogni Zenâr al rive par scuedi la inicue “tasse Rai”; o ancje cuintri dal Ministeri de Istruzion e dal Ufici scolastic regjonâl che, no tignint cont simpri de 482/99 no àn voie di meti in vore lis deroghis che a permetaressin di salvâ la scuele di Migjee e dutis chês altris scuelis di paîs che a saran sieradis parcè che no àn i numars previodûts dal Ministri Gelmini. E tancj altris a saressin in cantins in pîts: volìno fevelâ di eletrodots o di altris intervents suntun teritori simpri plui stuprât?
Ma une biele cuerelute se mertarès ancje Isidoro Gottardo, coordenadôr regjonâl dal PdL, che comentant la assemblee dai cristians di vinars ai 21 di Otubar organizade de Arcidiocesi di Udin, al à declarât «il lavôr de glesie furlane nol vegni viziât de “malatie dal furlanisim”».
Ma ce isal chest “furlanisim” che al fâs cussì pôre al parlamentâr di Sacîl, tant di definîlu une malatie? Fasìn un paragon: se “l’ambientalisim” al è chel pinsîr che al met tal prin puest de sô azion il “fâ i interès dal ambient”, il “furlanisim” o podìn dî che al è chel pinsîr che al met tal prin puest de sô azion il “fâ i interès dal Friûl”. Beh, se cheste le considere une malatie, alore compliments a Isidoro Gottardo pe sô afermazion pardabon pôc onorevule!
Al ven propit di domandâsi se no sedi stade piês la jessude di Villaggio o sintî ciertis afermazions su la bocje di parlamentârs de nestre regjon. Cognossint tropis voltis che Gottardo si è metût cuintri dal Friûl (cuistion dal gnûf statût regjonâl, bataie cuintri de leç 29/2007 cuant che al jere inmò in consei regjonâl…) no nus smaravee e la rispueste noaltris le vin za: almancul Paolo Villaggio al à vude la creance di domandâ scuse ai Furlans.
L’OM DI BURI