SPECIÂL BIBIE – Un event di popul che al à coivolt ducj

Ancje i “Vip” a àn volût da il lôr contribût a la “Leture continue de Bibie par furlan”. Plui o mancul famôs, ancje lôr a jerin tra i 1.127 volontaris che si son passâts il testemoni dilunc di 7 dîs e 6 gnots li dal Oratori da la Puritat di Udin.
Tra di lôr politics come Maurizio Franz, president dal consei regjonâl, e i trê assessôrs regjonâi Elio De Anna, Claudio Violino e Roberto Molinaro. Al à let par furlan, ancje se al à origjins liguris, il sindic di Udin Furio Honsell e il president dal Udin Franco Soldati. Prin di lui la vôs plui cognossude dal Friûl, chê di Bruno Pizzul. Tra i vip ancje Enzo Cainero, l’organizadôr da lis tapis furlanis dal Zir di Italie, la retore da la Universitât dal Friûl Cristiana Compagno, Sonia Cossettini, atore di Tresesin traplantade a Rome e che o vin viodût in divieris fiction, ma ancje tal spot Rai sui “dialets” (li che, magari cussì no, al jere presint ancje il furlan) tal rûl de “vigjilesse”, il cjantautôr Dario Zampa, Alessandro Calligaris, president di Confindustrie regjonâl e i trê Arcivescui di Udin, bons. Andrea Bruno Mazzoccato che al à viert la leture e i emerits bons. Alfredo Battisti e bons. Pietro Brollo intervignûts prime dai fruts che a àn sierât l’event.
Valentina Pagani