SPECIÂL BIBIE – Une setemane che no si pues dismenteâ

Il grant libri che al conserve lis firmis dai 1127 letôrs cierts (cualchidun al à smiezât la part cuntun amì, pûr di partecipâ) al è plen di dedichis e di pinsîrs “in ricuart” di pre Toni Beline e di pre Checo Placerean. Culì, neri su blanc, lis frasis lassadis di cûr de int che e passe pe Capele de Puritât: “une grande esperience pe int furlane”, o “me ricuardarai par dute la vite”, “lei la Peraule in lenghe al tocje il cûr”. Di 1113 a 1118, si cjatin lis firmis de famee Placerean, che e à let in bloc e che e je risultade la famee plui numerose.
Ma e je la organizazion a ricuardâ trop che la int e i stes udinês a son stâts dongje ae manifestazion. “La citât, dute, nus è stade dongje – al dîs Giovanni Candussio di “Advantage Italia” –. Nus puartavin il cafè, di continui a vignivin a viodi se o vevin dibisugne di alc. I stes polizais che a passavin di tant in tant par controlâ che dut al fos a puest, une buinore si son presentâts cun lis brioches pe gulizion”. E Candussio, front man te cjasute narançon dal infopoint, al zonte ancje il particolâr di tantis personis che, passant li denant, a lui si indreçavin: “Puedio lei cumò? Vêso une part di dâmi subit?”. “Verementri, al jere di prenotâsi plui di un mês za fa!”. In tancj, a tornavin ancje dome a scoltâ. Ogni dì. “Il pic des visitis si regjistrave tor di misdì, e des 5 aes 8 sot sere. Ma o pensi che nissun al vedi mai let dibessôl”, e spieghe Elena Zanussi, de ARLeF.
Fra i letôrs partecipants, il grup plui numerôs al è stât chel organizât di Paolo Bortolussi di Vildivar, dutun cu la Universitât de Tierce etât di Rivignan: 50 personis, jenfri chês ancje tancj zovins, dal dopodimisdì aes 10 di sere dal lunis. Pre Romano Michelot al à compagnât personalmentri i grups di Vilegnove e di Ruvigne. Ma al letorin si son alternâts ancje Dino Persello, che al à puartât 15 amîs, il coro di Iplis, il grup de Filologjiche, chei de Agjenzie Regjonâl Protezion dal Ambient (Arpa), la scuelute di Palme. Dal pont di viste gjeografic, alte la partecipazion de Cjargne e di ciertis zonis dal Friûl, tant che Spilimberc e Feagne. Come letôrs singui, in ARLeF a ricuardin il câs di un triestin e di une austriache che e sta a Udin, che si son presentâts aes provis. Po di une femine origjinarie de Grecie. Plui voltis, e je rivade ancje une siore de Emilie Romagne che il furlan no lu fevelave ma che e voleve partecipâ a ogni cost. E, ae fin, je à fate.
In tancj di chei che no son rivâts a jentrâ te liste dai letôrs a àn dade la lôr disponibilitât tant che sostitûts: in pratiche, se cualchidun si inclapave o no si impensave che al jere il so turni, la organizazion e veve une liste di volontaris cun disponibilitât 24 oris su 24 a presentâsi sul puest, tal arc di un timp di 30 o 45 minûts. “Lis defezions si son contadis suntune man: dome une volte, mi è capitât propit a mi, a ‘nd vin vudis trê, une daûr chê altre, al è stât il moment plui critic”, al dîs Candussio.
Il fatarel plui divertent lu à regalât Bruno Pizzul. La dì prime, ospit di une trasmission sportive, al à dit di jessisi impegnât cetant: “Mi àn dât un toc impestât”. Gjavât fûr dal libri dai Numars, il toc al jere folcjât di gjenealogjiis, di çocs familiârs e di nons ebraics. Pizzul si è presentât al Infopoint cul solit spagnolet in bocje e, cjalant par stuart i operadôrs: “Ma, fantats, ce mi vêso dât di lei? La formazion dal Iraq??”. Il sindic di Udin, Furio Honsel, al è stât l’unic a no lei doprant il stampât mandât de organizazion, ma diretementri de sô personâl Bibie par furlan. Enzo Cainero, invezit, al à provade la sô leture la dì prime, in aeropuart a Ronchi, judât dal president de Ana di Udin, Dante Soravito De Franceschi, intant che a spietavin il rientri de Julia dal Afghanistan.
Oscar Puntel e Mauro Della Schiava