ATUALITÂT – Rai? No, mai!

Ore che stin a spietâ altris doi agns, lis telis di ragn a involuçaran la memorie dai nestri sorestants. Oltri che, ben si intint, dai dirigjents de Rai. E je lade cussì, purtrop: il contrat di servizi jenfri Rai e ministeri dal svilup economic al à cjapât ai 6 di Avrîl il bon acet definitîf. E cence il ricognossiment de lenghe furlane pai programs che a varan di jessi inviâts de tv di Stât. Al vâl pai agns 2010-2012. E je lade a finî cussì come che o vevin za ben ben nasât che e las a finî, di là des rassicurazions e da lis pussibilis manovris di azion “last minute” che si son tentadis. Duncje, se la discrepance temporâl che e vîf la politiche e pues jessi sfrutade a nestri pro, alore, di vuê indevant, no si pues molâ plui il vues. Almancul fintremai che il ricognossiment de marilenghe nol cjatarà il sô spazi. Come che costituzionalmentri, legjislativementri al sarès just. E come che al ven pe lenghe todescje e ladine, pe provincie di Bolzan, pal Ladin de provincie di Trent, pal francês per Val Di Aoste e pal Sloven chi di nô. No si pues spietâ di fâ la bataie ogni doi agns e po roseasi il fiât.
Cheste e je stade la fin, za scrite, dal intrigât percors. Che in struc al à viodût in prin lûc l’inseriment de lenghe e culture furlane tal test aprovât da comission di Vigjilance Rai, par po sparî dilunc il viaç dal document viers il CdA Rai. La nestre delegazion furlane par pocâ il parlamentut bicjamerâl e jere rivade tal so intent. Ma cuant che, dopo, lis bolps romanis a àn capît di no jessi plui tampinadis, di nô vê nissun parlamentâr che al seguìs di dongje la cuistion, a àn zirât la fertaie cemût che ur comodave. Adieux!
Chest al è il risultât. La letare di proteste dal Assessôr regjonâl ae culture Elio De Anna denant ae esclusion no je coventade a nuie. Tant che lis berladis al scandul dai nestri parlamentârs – vitimis dal lôr stes lassisim – cuant che ormai al jere masse tart.
Par viodi la programazion in marilenghe indreçade di mame Rai e varà di stanziâ i bêçs la Regjon. Lis trasmissions a saran ancjemò a progjet, no continuitât, ni garanziis. Che po, par dîle dute fûr dai dincj, a son simpri chês trasmissions, cence masse sfuarç o fantasie autorâl. Cul pericul, po magari, che i nestri assessôrs regjonâi a tornin a dî: se o finanzìin la Rai, o scugnìn drenâ culì lis risorsis par tv e radios privadis. No. No si pues spietâ altris doi agns prime di tornâ a sintî la stesse storie. A Roma a saran simpri lis bolps prontis in vuaite. No podìn permetisi il lus che lis telis di ragn a invulucin la memorie dai nestris sorestants.
Oscar Puntel