ATUALITÂT – O vin di movisi

«Scoltâts ducj, e je ore di passâ des peraulis ai fats»: il sproc dal assessôr ae culture Elio De Anna al mostre ben cemût che la Regjon e intint movisi sul teren de tutele de lenghe furlane cumò che i “Stâts Gjenerâi” a àn metût dongje plui di 40 realtâts associativis e istituzionâls par fevelâ ad implen des dibisugnis dal furlan. E la direzion e je clare, ancje parcè che e je la stesse che e jere stade individuade tes tantis audizions che il consei regjonâl al veve fat prin di fâ buine la leç 29/2007.
I PONTS PRIORITARIS_ Comunicazion, scuele, formazion e ricercje: a son chestis lis prioritâts che la zonte Tondo e vûl puartâ indevant, ancje pontant i pîts a Rome par vê ce che al covente al Friûl. «Il Guvier talian al scuen dâ atuazion ae leç 482/99 – al dîs De Anna – e cuvierzi cun fonts statâi i programs Rai che a vegnin fats par furlan». La situazion di fat e je clare: «la Cort costituzionâl – al pant l’assessôr – nus da reson e soredut la Commission parlamentâr di vigjilance e veve zontât il furlan aes lenghis che si previôt di tutelâ cul contrat di servizi, daspò dîs agns che Regjon, Comun, Provincie, Universitât e Curie lu domandavin cun fuarce».
ISTRUZION_ Plui jutori pe ricercje e pe formazion al è stât domandât de Universitât: ancje parcè che la vere sfide e je chê di fâ jentrâ simpri plui in vore l’insegnament de lenghe furlane inte scuele. L’assessôr ae istruzion de Regjone Roberto Molinaro su chest al è otimist: «Za l’an di scuele che al vignarà al varès di jessi pussibil meti in vore il regolament» al dîs. «Nuie ce dî sul fat che l’ordinament de Regjon al domande di ricognossi il furlan tant che element di fonde dal sô jessi autonome: par chest la tutele e je par nô une prioritât – al spieghe – e chest an Regjon, Arlef e Ufici regjonâl per scuele a àn fat une campagne unitarie par sburtâ lis iscrizions al insegnament dal furlan. Cumò la definizion dal regolament e va ben, ma si ten in man il glimuç de cuistion dome se si rive ae risoluzion dal conflit di competencis su la istruzion jenfri Stât e Regjon».
Walter Tomada