ATUALITÂT – Vonde cjacaris

«O sin fers di trê agns: cumò vonde»: a son chestis lis peraulis che a puedin fâ un struc svelt de opinion de plui part de int che e à cjapât part ae Assemblee dulà che si à cirût di fâ il pont su la situazion de lenghe furlane. A jerin un grum – trente e passe – i iscrits a fevelâ tai Stâts Gjenerâi dal furlan intal auditorium de Regjon di vie Sabbadini, ma cetante di plui e jere la int intervignude. Presints a jerin i dirigjents dal ent regjonâl Augusto Viola e Giuseppe Napoli, e il responsabil organizatîf pe tutele e la valorizazion dal furlan William Cisilino, ma ancje il president de Arlef, Agjenzie regjonâl pe lenghe furlane, Lorenzo Zanon. Plui significatîf il cjapitul politic: pôcs (ancje se par sigûr bogns) i nons di segnalâ. A jerin culì dome il sindic di Faedis e rapresentant de Associazion dai Comuns Cristiano Shaurli e l’assessôr provinciâl ae Culture de Provincie di Udin Elena Lizzi e i conseîrs regjonâi Annamaria Menosso e Roberto Novelli.
POLITICS ASSENTS_ Il president de Filologjiche Lorenzo Pelizzo al à vût bon zûc in cheste situazion a fevelâ di un disinterès de classe politiche furlane pe nestre lenghe. Propit intun moment dulà che il câs de mancjade inclusion dal furlan intal contrat di servizi Rai al varès di stiçâ une solevazion bipartisan in ducj chei che a crodin che la lenghe e sedi un valôr, la presince politiche e je stade pardabon sclagne. No si pues dî la stesse robe pes associazions e pai operators de scuele e de comunicazion, che a àn volût jemplâ la sale cu la lôr sperance di pandi lis lôr dibisugnis e vê, se si podeve, novitâts positivis.
DIFICOLTÂTS COGNOSSUDIS_ E i problemis che a son vignûts fûr a son simpri chei, a partî des risorsis che a van simpri al mancul, dal personâl che al varès di jessi formât, par rivâ ai sportei che a van fats funzionâ miôr e ai investiments par tignî cont de ocupazion che la lenghe furlane e à viodût nassi su la sô tutele. A partî de plante organiche de Arlef, la Agjenzie che e varès di tutelâ la lenghe ma e je di un pieç sot organic. E cence nuie, nol devente nuie.
Walter Tomada