Dute colpe di dôs peraulutis: “…e friulana”. Che, stant a un emendament puartât in Comission di vigjilance Rai, al varès zontât di fat la lenghe furlane dentri dal Contrat di Servizi Rai – Ministeri Svilup economic: condizion inispensabil par inviâ une programmazion radio-tv par furlan, dant aplicazion a ce che al dîs l’articul 12 del leç 482/99. La assamblee bicamerâl e veve dât il so bon acet al stampon. Lu veve fat ae unanimitât. Di Palaç San Macuto, sede dal orghin bicamerâl di vigjilance, il test al cjape il troi che al puarte al setim plan di Viâl Mazzini. E si sa che i trois di Rome a son cetant ingredeâtts e spes petonâts di deviazions e tentazions.
IL CDA RAI AL TAIE IL FURLAN_ Sta di fat che, un colp di blanc culì, un colp di emendament culà, il Contrat 2010-2012 su la taule dal CdA de Rai al ven incjemò modificât. E – sorprese – chês dôs peraulutis si pierdin par strade. O miôr: a son stadis lassadis par strade. Une notizie di agjenzie des 16.01 – o sin ai 3 di Fevrâr – e comuniche il vie libare dal Consei di aministrazion de Rai al gnûf imprest. La aprovazion e je vignude a maiorance. La conseire dongje de Leghe, Bianchi Clerici, e jere assent. Invezit i conseîrs di opposizion De Laurentiis e Rizzo Nervo, si son astignûts.
Inalore, pal moment, tal tierç Contrat di Servizi aprovât di cuant che e esist la leç 482/99, il furlan al è ancjemò in spiete. Al à vût il so moment di glorie “balneâr”, sfloreât tant de Vierte, colât in plen invier. Si impensaiso de delegazion furlane vuidade di Roberto Molinaro, za assessôr regjonâl ae culture? Ta chê volte a vevin concuardât cu la Vigjilance lis tapis, che a varessin inserît lis trasmissions in lenghe, jenfri i oblics de Rai. Cun gjonde de Regjon, che cussì no varès vût spesis.
POLITICHE DISTRATE_ Il lassismi politic tal fratimp al à fat colâ cheste azion di lobbying. Il president Renzo Tondo su la cuistion si è simpri mostrât frêt (“No je la prioritât”). Messedant lis cjartis de sô zonte, la deleghe culture e je finide al folp Elio De Anna, che i nd à metût un pôc par capî che il mont des lenghis de Regjon nol funzione propit come il sport.
Ce dî, po dopo, dai nestri parlamentârs? Che no àn fat nuie. Daspò di ce che si jere otignût in Commission di vigjilance i nestris rappresentants – e chi sedi di maiorance che di oposizion si son mostrâts unîts – no si son nancje curâts di seguî l’iter dal test. Par po berlâ al scandul, cuant che si son rindûts cont de fertaie. A varessin fat il lôr lavôr, nol sarès stât nissun scandul, ni nissune berlade.
LIS SOLUZIONS_ Cualis cumò lis manovris di azion? Dal pont di viste tecnic, il gnûf contrat al à di rivâ li dal ministeri des comunicazions. Duncje, alc si podarès ancjemò fâ. Intant, però, o segnalìn che tant che noaltris o vin di scombati par vê une serie di produzions di mame Rai, a Triest no si fasin scrupui e no coventin nancje autorizazions ministeriâls par finanziâ e mandâ in onde trasmissions istruttivis e seguidis di cetancj di triestins, clâr in dialet triestin. Nuie di personâl, cuintri “El campanon” – blasonade kermesse in dialet, començade ancjemò tai agns 50, che tra tecnics, operadors, ators, e dopre almancul 12 personis. Dut gratis. Invecit, pe lenghe, dal 2002, si son spindûts 1,6 milions di euros.
DE ANNA AL CONTATE IL MINISTRI_ L’ultin inzornament al viôt protagonist l’assessôr Elio De Anna. Che al à cjapat cjarte e pene e al à scrit al ministri al Disvilup economic, Paolo Romani. ”Si trate di un at gravissim – al à con di plui rimarcjât l’assessôr – par vie che e je une violazion de leç 482/99, aplicative dal articul 6, ma soredut parcè che al cree une discriminazion no justificade fra minorancis sul teritori de regjon Friul Vignesie Julie”.
La letare e je stade spedide par cognossince ai presidents de Rai, Paolo Galimberti, e de comission di Vigjilance, Sergio Zavoli, oltri che al diretôr de sede Rai par il Fvg, Roberto Collini che al diretôrs e de sede Rai pal Friûl Vignesie Julia, Roberto Collini. De Anna al domande un incuintri urgjent cul Ministri par valutâ la pussibil soluzion di cheste criticitât. Ma i fats a dimostrin di jessi, ancjemò un viaç, masse lontans des cjacaris.
Oscar Puntel
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +