CULTURE – CONTECURTE. Une conte par Nadâl, e une domande

Provìn a imagjinâ di jessi une altre volte là, sù sul Golgota, e di sintî une vôs che prime nus spieghe l’antefat (come che la crodince e à volut contânus) e dopo il fat (che al inzorne l’antefat secont une volontât che il fi dal Creadôr si è proponût come variant par judânus): un sacrifici gjenerôs, proviodût par meti in sene une gnove storie denant dal mont, par liberâlu de soference dal sintiment di colpe, rinovât tai secui cuintri l’uman destin, e la reson che nus tormente, e i pinsîrs imberdeâts ator dal sens di vivi, e la muart – che nus spiete di subite da la vierte de infanzie, slargjant i voi sul destin.
Lui, il predicjadôr, tornât achì une seconde volte par judânus, che si è inclaudât di bessôl, prime i pîts, e chê man a çampe dopo, denant di nô e martielant i clauts cuintri la crôs, e tal ultin nus domande di bati l’ultin claut, fûr par fûr, traviers chê man che nus lasse benedîts cul segn de Crôs. E alore, cristians – agns daûr i mês, tra cualchi dì Nadâl –, parcè no inclaudâlu subite sul tronc dal arbul, chel frutut rivât dal cîl daûr di une comete, prime che al deventi om misericordiôs par perpetuâ la umane soference par dibant (o isal miôr lassâlu inte stale cun sô mari vergjine e un pari che nol è so pari, e continuâ a ornâ lis ramascjis di balutis maludint il mont che al va indenant istès)?
di Frank Spada