CULTURE – Sot dal arbul regâi «par furlan»

No cate la influence de crisi economiche, il tai dai finanziaments e la «prognosi riservade» de narative, fat al è che il panorame editoriâl in marilenghe ae fin dal 2010 al somee avonde vivarôs.
GRANDE VARIETÂT DI SIELTE_ Sgarfant tra lis propuestis che si puedin cjatâ, tra chês jessudis di pôc o viodìn che a ‘nd è robe par ducj i guscj. Cui che, il Nadâl che al ven, al varà voie di regalâ (o regalâsi) un libri in marilenghe al varà ce sielzi.

PAI PLUI PIÇUI_ Scomençant cun alc pai fruts, la editore KappaVu e publiche la gnove serie des storiutis di «gjatUt» (Ut pai amîs): GjatUt e la ruie, GjatUt e la pavee, GjatUt e il pessut. I libris a son di dôs mestris di Buie, Deborah Crapiz e Doriana Alessio, e a son pensâts pe scuele primarie ma conseâts ancje a chei gjenitôrs che a àn voie di lei alc di furlan ai fîs. Se dopo i canais a son apassionâts dai gnognosâurs di Dree Venier a ‘nd è di bielis novitâts. Pai plui piçui al è il Gnognocolôrs un album cun dissens di podê colorâ cun scritis par talian e… inglês, pai plui grancj o vin invezit Gnongnosaurs 2, il secont libri de saghe di strichis jurassichis. Il libri al à un grum di storiis ineditis e al si invie a jessi il best-seller furlan di Nadâl.
PAR CHEI PLUI GRANDUTS_ Un altri librut pensât pai zovins, ma no dome, al è Io vivo in un castello – Jo o vîf intun cjistiel di Laura Guaianuzzi pe editore Omino Rosso, un libri bilengâl talian-furlan che doprant la vôs dal piçul Pileu, fantacin che al vîf te Ete di Mieç, nus conte la vite intun cjistiel.

NARATIVE_ Invezit la editore KappaVu nus ufrîs il prin libri di Gianfranco Pellegrini Cuatri stagjons dal an, contis de dinscressite, autôr che si è za fat notâ cun des contis su lis rivistis. De editore Forum o vin invezit dôs propuestis, l’interessant romanç di Luchini Coventave ve pôra recensît su chest numar de Patrie e il libri di un grant de leterature furlane, Leonardo Zanier (sot te foto) cun Carnia Kosakenland Kazackaja zemlia, storiutas di fruts in guera. Un volum di contis furlanis cun traduzion par talian e cuntune postfazion di Mario Rigoni Stern.

OPERA OMNIA DI BELINE_ Se invezit si cîr alc di riflessîf Glesie Furlane e je daûr a stampâ la opara omnia di Pre Toni. Tra i titui di chest an o segnali la racuelte di articui e saçs Struture e/o Culture. La culture fûr dal popul e je inlusion e pecjât, cu la prefazion di Silvana Schiavi Fachin, e Amôr di Patrie, racuelte dai editoriâi publicâts su la Patrie, cu la prefazion di Dree Venier. In sumis se a Nadâl si à voie di cirî un libri par svagâsi, par gjoldi o par pensâ, si pues fâlu ancje par furlan.
Maurizio Biasizzo