CURTIS E CHE SI TOCJIN. La visite dal President de Republiche

Duncje: il President de Republiche Napolitano al è stât di sigûr masse pôc a Udin e in Friûl. Al à però dit avonde di ce che i furlans si spietavin di lui e che no vevin mai sintût di altris Presidents de Republiche vignûts achì, tai agns passâts. Ven a stâi, che il Friûl al à une sô storie, une sô culture, une sô lenghe. Che al sint fuarte la dibisugne dal autoguvier e che al pratint, rispiet a Triest, une funzion centrâl tai rapuarts di pâs, di amicizie e di svilup cu la Europe centrâl e orientâl. A tancj, che dut chest ai furlans lu dinein, vuê o podìn rispuindi che ancje il President de Republiche le pense come noaltris. Cui che si spietave che il President al disès di plui, si è dismenteât che lui nol à podês esecutîfs, come i oms di guvier. La sô figure e je di alte garanzie costituzionâl, di impegn par fâ rispietâ la Costituzion e lis leçs dal Parlament. E cussì lui al à fat, rispiet ai dirits costituzionâi dai furlans che i siei interlocutôrs i vevin presentât tai discors e sui gjornâi, in chescj dîs, ma che i vevin mandât ancje prime, a Rome. Cu lis sôs peraulis, il President de Republiche al à cussì dât une alte cuvierzidure ai nestris dirits.
A son purtrop i politics, i lôr partîts di çampe e di drete che fin cumò a son restâts cidins rispiet aes afermazions dal President. E su ce che ur spiete di fâ a lôr – a Rome e a Triest – par rispietâ e meti in vore la Costituzion de Republiche, lis Convenzions europeanis, lis leçs talianis come la 482.
Ai furlans che vuê, come îr, anzit plui di îr, a pretindin il rispiet dai lôr dirits, la valorizazion de lôr identitât, de lôr lenghe, dal lôr dirit al autoguvier, ae autonomie, ur spiete duncje di rinfuarçâ la lôr bataie par puartâle al sucès. Cjapant dentri simpri plui zoventût, int furlane ancjemò incierte, di ogni lûc dal Friûl, Comuns, Categoriis produtivis, Sindacâts dai lavorents. Parcè che un Friûl plui furlan al sarà ancje plui braurôs de sô incressite economiche e sociâl.
ARNALT BARACÊT