MEDITANTLIS TAL SO CÛR. A proposit di invasions

Simpri di plui ancje in Friûl e su la stampe locâl al ven dibatût il problem de invasion dai extracomunitariis e sore dut de int di fede islamiche che e cjape simpri plui pît e che si impon  midiant di moscheis, di scuelis e di cimiteris. Daprûf di chescj fats la int si divît fra une vierzidure tai dirits umans a un sierâsi pe salvece de Europe. Autôrs come O. Fallaci o M. C. Allam nus terorizin cui pericui; la Leghe e fâs une crosade cul venerabil Marc di Davian e la bataie di Viene dal 1683; il magjisteri de glesie nus mene su la strade dal dialic; altris moviments nus visin che chescj fats a son une benedizion. E dut al devente un grant gjespâr.
Prime di dut i musulmans a no son la prime invasion che o vin: dal 1866 la Italie si è imponude di parone in Friûl. E à menât e messedât culì dut ce che i à parût. Cjalant a la culture islamiche, tignìn presint che o sin za stâts svinidrîts di chê taliane.
Cjacarìn di Islam, ma batìnsi par une Italie federâl, cuntune nestre plene autonomie di Rome e di Triest.
Tignìn presint che a esistin i segns dai lûcs che a son di rispietâ; nissun pues vignî cjase mê a fâ ce che i pâr e i plâs; chest però al vâl ancje pe Italie che si dîs civîl e no dome pal Islam che al ven marcât di barbar.
I maometans a vulin distruzi la nestre religjon catoliche; ma chest lu stin za fasint di bessôi cu la nestre societât materialiste, sclave dal marcjât e dal profit. O stin pierdint ancje la memorie de anime cristiane: o stin deventant teren di ocupazion dal prin sensâr che al passe. No si pues difindi il crocifìs tes scuelis, cuant che lis scuelis a dan chei politics e inteletuâi che la television e presente; no si pues tignî  la crôs tai tribunâi se la justizie e lis peresons a son di sgrisulâsi; no si pues difindi il Vanzeli tune societât che lis regulis dal Vanzeli nancje no lis cognòs.
Si podarès dî: Furlan, prime di curâ i maometans, cure te stes.
In chest gjespâr la nestre glesie locâl e fâs ben a tasê parcè che fint cumò no à difindût lis etniis di cheste tiere, ma si è butade cu la politiche dal invasôr e nus à imponudis regulis di une religjon foreste al nestri spirt.
A proposit di invasions, o vin dibisugne di voltâ pagjine, di riviodi dut e di ricjatâ, se o sin in timp, la nestre anime furlane. Daspò la Bibie e zonte: «Volêt ben ai forescj, parcè che ancje vualtris o sês stâts forescj». (Dt. 10,19)
Al di sore di ogni discussion, tes necessitâts, no stin a cjalâ ni la religjon ni la piel, ma cirìn di vierzi cun sintiment anime e cûr.
pre Tonin Cjapielâr