CULTURE – CUSINE. Vueli e Friûl: un vecjo amôr tornât di mode

Che il vueli di ulive al sedi simpri stât presint te nestre regjon, al è un fat aromai dât par sigûr, e no dome te lungje e inlidrisade tradizion cjarsuline e istriane (chê de marche «Dop Tergeste»), ma ancje in Friûl, dulà che la presince dal ulîf, dongje de vît, e je documentade fin dai timps de Rome antighe. Si lu viôt dal fat che al è ancje rapresentât tai mosaics di Aquilee e in tantis pituris, de  difusion in regjon di un cognon tant che Olivo, ma ancje in cualchi toponim iluminant, come Oleis/Vuelis di Manzan (e migo a câs, al è sede di une fieste dedicate al vueli furlan…).
Purtrop, la tradizion di coltivâ l’ulîf in Friûl, tai agns e je stade metude un pôc in bande, massime  daspò la Vuere. In part, pal fat che a jerin za altris lûcs de Italie che a produsevin vueli extravergjin cun plui convenience economiche, e cussì i contadins furlans àn vût miôr dedicâsi a altri (massime ae vît). E po dopo, parcè che – cul «boom economic» – forsit si à un pôc tacât a zuiâ a «fâ i Americans», sielzint di doprâ robis plui «di mode», come vuelis dal savôr pui lizêr (par esempli,  chel di blave), o la spongje par fâ di gustâ, o fintrimai robis industriâls dal aspiet «moderni», come la margarine. Parsore dut, in ciertis zonis di Italie – come il Friûl – dulà che eje une gastronomie fie di un miscliç tra culture mediteranie e culture miteleuropeane, e je simpri esistude la «dople opzion» di doprâ un tic il vueli, un tic la spongje.
Par fortune, di un pôc di timp in ca, la tindince si è invertide e il vueli di ulive bon – cu la sô ricjece di savôrs e lis sôs proprietâts nutritivis un grum plui sanis dai cussì clamâts «gras polinsaturis» – al è tornât di mode, e in reson di chel, il coltivâ ulîfs al sta tornant a jessi une opzion interessante dal pont di viste economic.
No che al sedi facil: tornâ a meti in pîts une produzion significative, massime cumò che la competizion dal marcjât e domande un nivel cualitatîf alt, e no son plui i nonos che si impensin ce mût che si faseve une volte.
In chest sens, une vore impuartant si sta rivelant un progjet metût in cjamp dal Ersa za de metât dai agns Novante, dedicât propit a cjatâ fûr i teritoris miôr par cheste coltivazion (massime la «Riviere» pedemontane e i Cuei Orientâi dal Friûl), e a cjatâ cualis che a son lis «cultivar», o ben lis varietâts che miôr si puedin adatâ al Friûl (cjalant, par esempli, di plui al Venit, te zone dal Garda, pluitost che a es varietâts dopradis te vicine Istrie, dulà che a àn la influence dal mâr).
Dut câs, baste zirâ un pôc pe campagne furlane, e si note cun plasê che dulà che prime a jerin cjamps di blave o vignâi mal doprâts, cumò a tachin a comparî plantis zovinis di ulîf, ancjemò piçulis e leadis par dâur une forme, ma che a fasin ben sperâ di podê, o prin o dopo, vê une produzion significative di vueli furlan.
Parcè che, in fonts, al è propit vêr che i vecjos amôrs no si dismentein mai tant facilmentri…
Margherita Timeus