ATUALITÂT. Furlan lenghe francje dal business mondiâl dal Friûl

E à cjalât il ministri pal forest dal guvier talian Franco Frattini e la presidente de Confindustrie taliane Emma Marcegaglia e ur à dit “Mi displâs se no capîs, ma no pues fâ di mancul di tacâ par furlan” e il teatri Zuan di Udin al è sclopât intun batimans entusiast. Cussì si è viert l’intervent di Sandra Pupatello Pizzolitto, di Windsor in Ontario (Canadà), ma cun saldis lidrîs furlanis “Di Morsan dal Tiliment, il paîs des ocjis” e à marcât cun braure.
La ministre dal Ontario e à incentrât la prime part dal so discors fevelant dal so rapuart cul Friûl e dal leam che e volarès imbastî cun chê che e rapresente la puarte privilegjiate cu la comunitât europeane “Fint cumò cui furlans migrânts si à fevelât dome di mangjâ e di culture” e à vût dit intune interviste “Ma al covente che tra furlans di ogni bande dal mont si tachi a fevelâ ancje di business”. La Ministre Pupatello e à continuât par inglês descrivint la realtât economiche canadese e in particolâr dal Ontario, il stât federâl che di bessôl al rapresente il 40% dal Prodot interni sporc di dut il Canadà.
In cont di identitât come element di disvilup e di rinassite par vignî fûr di une situazion no biele come chê che al è daûr a passâ il sisteme economic atuâl, ancje il “paron di cjase” Adriano Luci, president di Confindustrie di Udin al à tignût a marcâ i rapuarts tra furlans, tacant propit dal titul de assemblee “Il Friûl imprese tal mont”. Di fat al à dit “Al maravee che i contats che il Friûl al ten cui furlans ator pal mont no vedin rivât a tradusisi intune incressite preseabil des relazions economichis: al è un patrimoni che al va metût in rêt”.
Une fuarte cjapade di posizion e je stade fate ancje a pro dal atenue furlan “L’interès des istituzions e la atenzion no podin mancjâ: il rûl de educazion al è decisîf”. Il president Luci al à tignût a marcâ il concet che la scuele e je un imprest essenziâl e e va sostignude, cussì come che “e va rinfurcide la identitât e la autonomie de Universitât dal Friûl, che si è integrade cul teritori deventant un fatôr di coesion e di cressite de nestre tiere”.
Un spirt identitari che al à cjapât une vore la atenzion dal public e di ducj i intervignûts, tant che ancje la Emma Marcegaglia, cjapant la peraule e à cjalât la ministre Pupatello e i à dit “Jo no feveli la lenghe furlane, ma o ai capît buine part dal intervent de ministre e magari la prossime volte o impararai ancje dî cualchi peraule par furlan”.
Christian Romanini