SPECIÂL. Tergjestin, il ladin di… Triest

A Triest al è une sorte di tabù, un afâr seri che al è miôr lassâlu taponât tai scansei dai archivis. Fûr che cualchi studiôs, in dì di vuê pôcs triestins a san che, fintremai a un pâr di secui za fa (o forsit dome uns cent agns indaûr), intal cjâf lûc de regjon si fevelave un dialet dal furlan, clamât tergjestin. Un lengaç retoromanç imparintât cul ladin e cul furlan, che al pandeve une continuitât gjeografiche e linguistiche cul Friûl. Stes discors pal muglisan, disparît cualchi an prime o dopo dal tergjestin.
CONTINUITÂT LADINE?_ Al pâr duncje che fin a uns dusinte agns indaûr e fos esistude une fasse sul mâr Adriatic li che si fevelave un lengaç di divignince retoromance, une sorte di sprolungjament viers Soreli jevât de aree furlanofone, che al podarès jessi rivât fintremai ae cueste istriane setentrionâl (Cjaudistrie e dulintor). Tal so De vulgari eloquentia, il stes Dante, metint adun furlans e istrians, al scrivè: «Post hos aquilegienses et Ystrianos cribremus, qui Ces fas-tu? crudeliter accentuando eructuant» («E po cjalìn ben Aquileiês e Istrians, che a pronuncin Ce fastu? in maniere une vore ruspie»). Stant cussì lis robis, si pues imagjinâ un continuum linguistic ladin che al partive da pît des Alps de Svuizare par rivâ al mâr de Istrie.
LA FIN INTAL VOTCENT_ Cheste situazion e le al mancul tal Votcent, cuant che a Triest il dialet venit al cjapà il puest dal vieli tergjestin par vie che la citât juliane, deventade “puart franc” dal Imperi dai Asburcs tal 1719, e viodè cressi di bot la sô popolazion fin a 200 mil abitants. La fuarte imigrazion e puartà ae sostituzion dal lengaç fevelât di secui cuntune fevele di gjenar venit, no cate che Triest no sedi mai stade sot de Republiche di Sant Marc. Dut câs, il tergjestin al fo inmò doprât di bande des fameis nobilis de citât, o ben di chês che ur disevis lis Tredis fameis, fintremai ae fin dal Votcent. Stant però a une scuvierte resinte dal studiôs triestin Pavle Merkù, te perifarie de citât une uniche famee contadine e varès doprât il tergjestin fin a pôcs agns prin de Prime vuere mondiâl. Tal 1889 invezit al murì Josef de Jurco, la ultime persone a fevelâ par muglisan.
AL CRIC… O IL TERGJESTIN_ Di uns dîs agns in ca il tergjestin al è tornât in vite graziis a Ivan Crico, poete e artist di Pieris, che al à a pene burît fûr la sô racuelte De arzènt zù (Di arint discomparît) pal Istitût Julian di Storie, Culture e Documentazion di Triest. In dut a son vincj poemis cun test talian a flanc. Il mert di Crico al è chel di vêi dât di gnûf vôs a cheste antighe variant dal furlan, midiant di une preziose opare di memorie storiche.
Alessio Potocco