LA INTERVISTE. A Milan, jenfri i 2.500 esposidôrs, ancje tredis realtâts furlanis

No sarà une semplice mostre di mobilie. Te so 49.me edizion internazionâl, la manifestazion di Milan e tire dongje une schirie di esposizions in contemporanie. Dentri, duncje, ancje cusinis, cun colegade tecnologjie, furniments pal bagn. E, in dut chest, si podevie forsit lassâ di bande il design? Dal sigûr no. Cussì, si cjatarà dut ce che al ruede tor ator e soredut dentri di cjase, cui che al larà a visitâ il prossim «Salon internazionâl dal Mobil», tal cuartîr «Fiera Milano» di Rho, dai 14 ai 19 di Avrîl (des 09.30 aes 18.30, jentrade riservade ai operadôrs dal setôr; domenie ai 18 di Avrîl, acès a ducj).
Un cartelon di cunvignis, dongje dai stands esposidôrs, al cirarà ancje di fâ il cuadri, di capî il stât de art dal marcjât sul plan nazionâl e forest. Ducj a confront: esperts, grandis e piçulis impresis a fevelâ di cemût jessî di cheste crisi.
Il Salon al è grancj numars: 2.500 esposidôrs, par un totâl di 211.500 metris cuadrâts di esposiszion. Culì dentri a ciraran di dâsi visibilitât ancje tredis nestris aziendis e doi ents di categorie furlans. In struc, pal setôr taulins e cjadreis, o varìn: All Kit srl e Softline di Pavie di Udin; Ergotek srl di Udin; Nuova Selas srl, simpri di Pavie. E siere la patulie de provincie di Udin la «Gervasoni spa», cun cjamaris, jets singui e matrimoniâi, salots, mobilie e imbotîts.
Vot aziendis a puartaran lis lôr mobiliis, diretementri di Prate di Pordenon: furniments  par salis di gustâ, stuis e salots, mobilie varie, taulis e cjadreis. A esponin: Armobil spa; Bimax; Compas Costruzione Mobili; Florida Family; Kriterio srl; Martex spa; Mobilificio Florida srl; Santarossa spa.
E sarà presinte ancje la «Azienda Speciale Imprese e Territorio – I. Ter», struture de Cjamare di Cumierç di Udin, che e cure la progjetazion e la atuazion di diviersis iniziativis, cul obietîf di sostignî il procès di internazionalizazion des piçulis e mediis impresis dal so teritori. In altris peraulis, relazions economichis cul forest, in colaborazion cu la Regjon Friûl -VJ e lis associazions di categorie.
Ae ombre de Madonute, e volarà fâsi lûs ancje il «Consorzio Eurosedia srl», cun sedis a Manzan e a Udin. Nassût tal 1968, al espuarte in scuasit cuarante Paîs. Al à il so pont di riferiment produtîf – taulis e cjadreis in len e ancje in metal – tal Triangul de cjadree. Il salon al coventarà ancje par chest: par tornâ a fâ alçâ in pîts chest distret industriâl, il plui nomenât de Patrie, metût in zenoglon di une crisi che e à mandât in casse integrazion centenârs di operaris.
OSCAR PUNTEL