La cuistion de açalarie te Basse furlane e ten banc za di un biel trat di timp sui gjornâi, tes assembleis dai comuns de Basse, tes comissions regjonâls, tes declarazions dai politics. Ise di fâ o no ise di fâ? Di une bande Danieli e la parone de Azozstal, la famose fabriche di açâl de resistence ucraine ae invasion russe, ven a stâi la Metinvest, a pro dal insediament industriâl, di chê altre i Comuns de zone, lis associazions e i comitâts di citadins de Basse e, tal ultin, ancje la zonte regjonâl di Fedriga, pûr daspò di cualchi cencenament, contraris. Il progjet al previôt un insediament industriâl di grandis proporzions che al darès lavôr a plui di mil maestrancis. E chest al è di tignî a ments in chescj timps di crisi dal lavôr.
◆ A esistin dut câs ancje dubis fuarts: un insediament di chê fate isal just plaçâlu tal pont plui bas de Zone Aussa-Corno, propit in face ae Lagune di Maran e Grau, zone di tutele ambientâl e dongje di sîts turistics tant che propit Grau e Lignan?
◆ E sbassâ il canâl dal Puart di Noiâr isal fatibil cence movi masse il mercuri dai fondâi? E chês tieris che a jerin sot dal nivel dal mâr e che a son stadis alçadis sono adatis a sostignî une industrie di chê sorte?
E la energjie che e coventarà, di dulà varessie di rivâ? Di Krsko?
◆ E po, i operaris saressino furlans e triestins o varessino di vignî impuartâts dal Tierç mont, creant un gnûf Monfalcon?
E parcè cumò dute chê enfasi par une industrializazion ucraine e cualchi an fa un niet totâl e inconfondibil ai 50 milions di euros che i cinês a vevin za disponût par un invistiment te zone?
◆ E cemût mai te zone industriâl plui biele dal Nord Italie, tal pont plui a Tramontane dal mâr Mediterani e tal cûr de Europe, a cinc oris di machine di Viene e a cuatri oris di autostrade di Munich, capitâl manifaturiere de Baviere, no esistial un invistiment todesc?
◆ Tantis domandis. Sperìn che lis visitis che il president Fedriga al fâs dispès a Washington a podedin dânus cualchi rispueste… ❚
Metinvest e li ator…
Mastiefumate
