De citât dai cantîrs ae fôs dulà che il Lusinç si bute tal mâr
Tu disis Monfalcon e in dut il mont si pense ai cantîrs. Chi di fat a nassin lis nâfs plui sioris e di lus che si puedin imagjinâ, comissionadis di armadôrs internazionâi impuartants, zoiis di bielece e di tecnologjie che a saran destinadis a vierzi lis ondis di ducj i mârs, de Americhe ae Cine. Antighe tradizion asburgjiche, nassude bielzà tal 1907 cu la famee Cosulich, che e vignive di Lussin Piçul e che propit in cheste gole adriatiche e varès invistît beçons par screâ il plui grant cantîr dal Imperi asburgjic, destinat a varâ scafs militârs e mercantîi di fature impuartante. Ma cheste no je la sole carateristiche dal lûc: tacant dai agns ’60 dal secul passât, Marina Julia e je deventade une stazion balneâr e di vacance cetant alternative a pet di altris splazis plui famosis de regjon, tant che Grau e Lignan. Puest pardabon inmagant par ducj chei che a preferissin l’ambient naturâl e la trancuilitât plui assolude rispiet al rumôr di chê che aromai e je clamade, ancje chi di nô, la “movida” balneâr. Chel “tum tum” di musiche e di matetât vosone che aromai si strissine vie par dute la gnot, in chê ricercje di divertiment che no pues fâ di mancul de esagjerazion. In ducj i sens.
◆ Il Lusinç si bute tal mâr propit chi dongje, jenfri Punta Sdobba e Val Cavanata, formant, cu la isule de Cone, une des risiervis naturalistichis plui bielis e impuartantis di dute Europe, tant che plui di cualchidun al à tornade a batiâ cul non di “Camargue furlane”. Piçui boscuts e pradariis, splazis al naturâl, dunis di savalon come intune conte esotiche e radis di robâ il flât, une voglade che si piert tal infinît, imbraçant une lûs che si sfante su la jerbe e su lis ondis dal mâr come intun cuadri impressionist. E po dopo, cjavai salvadis di pêl blanc, miârs di airons, razis e altris uciei che a rivin fin ca svolant di cuissà mai indulà, gjoldint di ce che une aree umide tant grande e pues ufrî a dute cheste biodiversitât. Si bandone la strade, si va daûr de linie blu de cueste. Di cualchi bande, no masse lontane, e je la isule di Barbane, là che al è un dai santuaris marians plui antîcs dal mont, venerât di Furlans e di Slovens, fat sù là che prime al jere un templi dedicât al diu celtic Belen, protetôr nuie di mancul che di Acuilee e lidrîs profonde di tantis sugjestions, rituâi, mîts e rîts che a fasin part di cheste nestre identitât furlane. Masse facil pierdisi intal inzirli dai secui. Dal moment che chi il respîr de Storie si fâs profumât e plen di misteri, bisugne azardâ alc di gnûf. Zuiant cu lis peraulis dal comic Paolo Rossi, che al è nassût propit di chestis bandis: “Se o pensais che Vignesie e sedi malinconiche, al è parcè che no vês mai viodût Monfalcon!”. Epûr, se o ves di conseâ une gjite fûr puarte in chestis zornadis di fumate, ploie e principi di Sierade, us disarès – in cuintritindince – di lassâsi cjapâ dal straniament di cheste tiere, lant a cirî propit a Monfalcon un mût gnûf di cjalâ il mont, magari ribalton e bastian contrari, dal sigûr diferent de ande comune, che par solit e je plui facile e plui scontade. Us promet che chi si percepìs une lidrîs furlane identitarie profonde, e o speri di dimostrâlu in curt.
◆ Provait a lassâ la machine dilunc dal cjanâl Valentinis, chel troi blu che si instrece cul Adriatic e si sburte fin dentri dal viâl dedicât a Sant Marc. I arbui a tachin a pierdi la fuee, e la congjestion dal trafic, simpri mat, us metarà sot piel chel sens di frêt e di desolazion che cualchi volte al jude a cirî il vêr spirt di une citât. Cualchidun al va a distanâle, cheste dimension, a Viene, a Praghe o a Lubiane. E je chê malinconie ruvide, che ti fâs vignî i sgrisui. Massime se ti sofle in muse la Buere, che dai Balcans e rive fin ca al galop scjavaçant il desert glaçât dal Cjars: un coridôr che si distapone a pene fûr dal circuit urban, viers l’Orient. Al sarà il moment di cirî confuart intun cafè o miôr intune ostarie, magari ruspiose, in cualchi straduce laterâl, plui parade. E propit cuant che la nape e tache a conzelâsi, e pîts e mans a reclamin misericordie, al pues capitâ di gjoldi di un piçul miracul: chi si cjatin ancjemò, come che une volte al capitave normalmentri dapardut, i brustuladôrs di cjastinis, taponâts sot dal volt di cualchi androne. Crodêtmi, chel profum al jentrarà par ogni aìne, come che a disevin i vecjos, che si contentavin di pôc, ma di un pôc che al bastave. Cul scartòs in man si torne fruts, e cul stes gust pe maravee si cjapin sù chei piçui regâi ferbints, che a scjaldin lis mans e lis profumin di bosc e di bon. Traviersade vie Carducci, lis vilutis elegantis, dal prin Nûfcent, a restaran indaûr, intant che devant dai voi si impiaran vetrinis di dolçuts, là che la gole no je plui un pecjât, ma une biele promesse. Mitteleurope? Il cûr profont de citât vecje si fâs anunziâ dal porfir che al pavimente il Cors dal Popul. Si lu capìs ancje parcè che chi lis machinis no son plui tantis. Cjapant il Pas dal Turion, cjalant il vecjo cjampanili si cjatarês intun lamp cjapâts dentri de prospetive di palaçs elegants, cjasis di siôrs, di chê buine borghesie che cul timp e à metût di bande une fortune. Une comunitât usade a lavorâ dûr, ma ancje a mantignîsi ben, cuntune cierte buine ande, un pêl rafinade, pretenziose, cualchi volte.
◆ La Salide dai Granadîrs però e je li a visânus che ogni concuiste e coste fadie. E alore sù, jenfri lens e arbui, tant che al pâr di jessi no in citât, ma sul Altiplan. Insom o cjatarês il cjstielat che la tradizion e atribuìs a Teodorì, re dai Ostrogots (490 cirche de ete Volgâr). Sot al polse un cjastelîr protostoric. L’imperadôr Oton I lu varès regalât al Patriarcje di Acuilee. Plui tart, daspò dal 1420, Vignesie lu varès trasformât in osservatori cuintri dai Turcs e dai Uscocs, i piratis trements dal Adriatic, intiziâts di Viene par che a dessin fastidi ae Serenissime. Un biel miscliç, no mo? Cuasi la profezie di ce che Monfalcon al è deventât vuê: là sot, intal labirint di straducis, si è insediade di cualchi an une comunitât multietniche che e cjape dentri plui dal 22% dai residents, cun ben 81 nazionalitâts diferentis, prime chê dal Bangladesh. Int che e lavore dûr, massime portuâi, lavoradôrs dai cantîrs, che a àn puartât fin chi ducj i colôrs dal mont, e ancje i siei profums, i siei savôrs, golosets che a cuchin fûr dai barachins, miscliçantsi cu la tradizion nostrane. La impression e je cheste: tante bielece e nas dal incuintri che al ten insiemi culturis diferentis intun profîl gnûf, mai viodût prime, inesplorât, inedit. Insome, come che al è simpri sucedût di chestis bandis, fin dal principi, cence che mai nissun al ves fevelât di “sostituzion etniche”. E che ancjemò al continue a sucedi, ore presint. Par nestre fortune. ❚
