Interviste cun Massimo Silverio, musicist cjargnel puartadôr
di une estetiche dute sô, scure e inmagante.
Li che une part fondamentâl de magjie e je l’ûs
de sô varietât cjargnele. Al è jessût di pôc il so prin disc «Hrudja», e un dai tocs che al è dentri al è stât trasmetût su la radio de BBC, metût sù di Iggy Pop tal so program.
O vin fevelât di dulà che al ven il disc, di lui, e de sô musiche
Massimo Silverio, classe 1992 di Çurçuvint («Disot» mi dîs), al è un cjantant e musicist che al è su la sene di un pôc, ma che chest an al à madressût il prin so disc solist: «Hrudja». Ancje se cui che lu seguìs cualchi cjançon la cognosseve za, ma di chest o fevelìn te interviste. La sô e je une musiche fate di atmosferis scuris e inmagantis, inmagante tant che la lenghe che al dopre, chê che si fevele te «mari dal Friûl» par pre Toni Beline: la Cjargne.
_
Massimo, cemût ise tacade la tô passion pe musiche? Ce studis âstu fat?
In cjamp musicâl la mê formazion e je di autodidate: no ai mai studiât musiche. Jo o soi eletricist, o ai il diplome al IPSIA di Tumieç. Par me la musiche e je simpri stade un maniere di sbrocâmi di chel che o vevi dentri, o ai tacât cjantant devant dal stereo, daûr di chel che o sintivi che al vignive fûr de cassis. E cussì o ai tacât a cjantâ in cualchi grup locâl. Di li o ai scomençât a sunâ la ghitare, po dopo il violoncel. Ma o soi simpri stât un che no si calcolave tant, sierât. O soi ancjemò avonde cussì. Une circostance impuartante par me e je stade frecuentâ il circul culturâl “Cressi” di Çurçuvint, li che si fasevin concierts e altris iniziativis, dulà che o ai vût mût di incuintrâ tante int dal cjamp. Fra chei, Giulio Venier, che mi à cjapât a sunâ cun lui e duncje o ai fate tante ativitât conciertistiche cun musiche tradizionâl.
_
E la cariere solistiche cemût ise tacade?
Intant che o sunavi cun altris o componevi alc, che o vevi simpri tignût platât, simpri par vie dal gno caratar che si diseve prime. Pense che la plui part des cjançons dal gno disc a son tocs che o ai scrit fra i 16 e i 23 agns. Tai agns o ai tacât a dâur une forme musicâl e o ai scomençât a realizâ alc in gracie dal incuintri cun Leo Virgili, un musicist che o stimavi tant e che al à preseât il gno lavôr. Incuintri che al è stât simpri li dal “Cressi” di Çurçuvint, che cumò nol è plui atîf, magari cussì no. Lui mi à judât a produsi i miei prins doi “EP” (l’EP al è un disc curt di uns 4 cjançons, alc plui di un singul ma mancul di un LP, ndr).
_
Duncje chest nol sarès il to prin disc…
I doi EP a son une autoproduzion, o ’nd ai fats stampâ uns doi centenârs di copiis che o davi a amîs o ai concerts. Al è il prin disc parcè al à une distribuzion e une produzion uficiâl. Dentri a son cjançons di chês di prime e cualchi toc gnûf, ma dut al è stât tornât a fâ di plante fûr cuntun gnûf produtôr, Manuel Volpe, che al à il studi a Turin. Un artist che o stimi une vore e che in Italie al lavore cun grant sucès di critiche. Al à vierzût une etichete musicâl propit par fâ chest disc, la Okum. Il disc al è “gnûf” ancje parcè che lis cjançons a son circoladis dome in Friûl, duncje a son “gnovis” pal ducj chei altris. Cheste no je une produzion furlane, e nancje une produzion taliane: o vin resonât pontant a fâ un disc globâl.
_
Un progjet ambiziôs!
Eh sì, però lu vin frontât cun chel snait. O vin cirût un sun che al sunàs crodibil in ogni part dal mont. Duncje o vin tratât i tocs intune cierte maniere, lassantju tant naturâi, ancje par chel che al inten la vôs: cence corezions di tonalitâts che cumò si puedin fâ in post produzion. Di fat par cumò o vin vût plui riscuintri fûr dev Italie che no chenti. O feveli di “nô” parcè che cui miei colaboradôrs o sin dut intune, par esempli il percussionist Nicholas Remondino, che al è simpri ator cun me.
_
E di fat il toc «Nijò» al è lât su la radio de BBC. Lu à metût sù Iggy Pop, une icone dal rock, te sô trasmission. Cemût ti sêstu sintût, che sui social no ti ai viodût fâ grancj anunzis…
Beh, o tornìn al gno caratar (al rît, ndr)! Ce aio di dîti: une robe fantastiche! No soi tipo di fâ il bulo cu lis cjacaris: la robe e fevelave di bessole. A Iggy Pop i segnalaran tantis robis, fra chestis al à decidût di metile: parcè che al decît lui, chest lu sai. E che i sedi plasude a un cu la sô “orele” pes produzions musicâls e je pardabon une sodisfazion. Nus à dât tante visibilitât ancje in Friûl, li che purtrop tantis voltis tu deventis considerât se prime cheste considerazion e ven di fûr. _
Il titul dal disc, «Hrujia», di dulà vegnial?
Al è il tiermin in langobart antîc di dulà che al ven il tiermin furlan “grusa/gruse”, la croste che e ven fûr cuant che si comede une feride. Cul disc o vuei rapresentâ chel moment jenfri dolôr patît e cure. La gruse e va vie planc a planc, cence visâsi, e dopo si sta miôr.
_
Lis tôs cjançons a son par cjargnel, cemût mai cheste sielte?
O scrîf di ce che o ai a cûr e o dopri la lenghe dal cûr. Tra l’altri no dome “dal cûr”, ma propit “marilenghe”: par esempli mi soi cjatât a rindimi cont a Londre di pensâ par cjargnel prime di fevelâ par inglês. A proposit, tal disc o cjanti ancje par inglês, e o incrosi cjargnel e inglês cu lis rimis. La nestre e je une lenghe che e je une vore musicâl, cetant di plui dal talian. E à suns che a somein inglês, a voltis francês, e a tantis altris lenghis. Par me e je ancje risultive di ispirazion: ciertis peraulis, ciertis espressions, o sint che a àn dentri une storie antighe, une sacralitât, che mi stice in maniere potente. Massime ciertis peraulis che putrop si stan pierdint e no capìs parcè. Mi plâs doprâlis tai miei tescj. Un esempli par dutis al è propit “nijò”: une peraule che o sintivi dî di gno nono ogni volte che i domandavi «Dulà vâstu, nono?», lui mi rispuindeve «inniò», di nissune bande.
_
La tô e je une estetiche no dome musicâl: mi somee che tu tegnis ancje ae part visuâl, sedi grafiche, fotografiche, che video. Ise vere?
Sì, par me lis imagjins a àn di acompagnâ la musiche e evocâ chel che tu sintarâs. Par fâlu o colabori cun doi artiscj, Riccardo Carpanese pe fotografie e Giulio Squarci pai videos. Cualchi volte o doi jo cualchi spont, ma pe plui part des voltis lis ideis a vegnin di lôr: a rivin a interpretâ benon la mê vision.
__
Un stîl particolâr ancje te vôs. Ise une sielte espressive?
Di zovin o sberlavi une vore di plui (al rît, ndr), ma cumò o ai cjapât un stîl di vôs plui sot vie: par me e je la memoreazion de fragjilitât. ❚
……………………………………………………………………………………………..
FOCUS. Il disc
Il disc di Massimo Silverio al è fat di dîs tocs: «Šchena», «Criure», «Jevâ», «Colâ», «Nijò», «Grusa», «Šcune», «Piel», «Algò» e «(Grim)». Lis atmosferis a son il reon di une estetiche tant personâl che e sune gnove e tal stes timp classiche, ancestrâl. Al messede classic e contemporani, folk e sperimentâl, acustic, eletroacustic e eletronic. I struments doprâts a son classics tant che il violoncel, il liron, lis percussions preparadis, il piano, o folk tant che la guzla – strument des Alps Dinarichis – ma ancje sintetizatôrs, ghitaris, orghins. Parsore di dut chest al è il ricam di une vôs stratignude ma che in cheste tension e risulte tant potente e liriche.
◆ Par vê une cerce de poetiche di Massimo, ve ca il test di «Nijò», la cjançon trasmetude te trasmission de BBC di Iggy Pop: «Neri al savôr/ Dal dut lassâ /Mai plui sarà lusôr/ Mai plui sarà vosâ/ Di lavris vierts/ Ador di un zûc/ Ch’al va cul dut passâ/ Poiansi in ogni lûc/ E tal sunsûr/ Cidin dal cîl/ Colât tal cûr/ Contimi/ Di cuan ch’i erin aiar/ In nijò a cjatâ/ La polse al suspirâ/ Neri arsinç/ Purpure fin/ Di un ridi a dut savôr/ Di un vivi a plen amôr/ Crot, come il flât/ Cjalcjât tal cuel/ E mai rindût svualât/ Un grop tignût in muel/ Scuindût, glotût/ Lontan dal fûr/ E vie dal dut passâ/ Sporcjât da ogni zûc/ Fint al sunsûr/ Berlât dal cîl/ In muse al cûr/ Contimi/ Di cuan ch’i erin aiar/ In nijò a cjatâ/ La polse al suspirâ». ❚
…………………………………………………………………………………………..
LINK & LEAMS
Cualchi toc di Massimo si pues scoltâ sul sît Bandcamp, li dal account de sô etichete discografiche Okum a chest link: okum.bandcamp.com/album/massimo-silverio-hrudja, dulà che si pues ancje ordenâ il disc. Si pues seguî Massimo e la Okum ancje su Instagram @okum.produzioni e su Facebook www.facebook.com/okum.produzioni. Massimo al à ancje un account personâl su YouTube www.youtube.com/@massimosilverio Facebook www.facebook.com/massimo.silverio e Instagram @massimosilverio. ❚
