Lavorâ insiemi e vierzisi al mont, cuintri dai prejudizis e dai stereotips

Dai 27 ai 29 di Zenâr, a Udin si è tignude la seconde edizion di “Dimmi. Le donne raccontano”. Un progjet che al fevele di dirits e che al à l’obietîf di vierzi prospetivis e stimolâ un dialic autentic tra lis personis. Rifleti, confrontâsi e lavorâ insiemi par formâ la base di une societât fondade su la inclusion e avualance, e che e sfide stereotips e prejudizis.
◆ Chest percors di pinsîr e formazion si indrece in particolâr aes gnovis gjenerazions, traviers di diviersis dissiplinis tant che filosofie, storie, leterature e dirit.
◆ “DIMMI. Le donne raccontano” al nas di une idee de societât cooperative Puntozero sot de direzion di Silvana Cremaschi.
◆ Chest an, sul palc, si cjatin figuris diviersis che a àn contat lis lôr storiis e percors di vite, fasint intindi che dome cjalant plui inlà dai nestris preconcets e stereotips si pues lâ indevant e cressi insiemi.
◆ Il program al è tacât cun Nives Meroi, bergamascje di origjin ma furlane di adozion e “siore dai vot mil”. Ducj le cognossin tant che une des plui fuartis alpinistis dal mont, ma pôcs a san che e je ancje scritore. Insiemi cu la gjornaliste Melania Lunazzi, e à contat di cemût che l’amôr pe mont le vedi sburtade a cirî orizonts simpri plui lontans, dulà che l’aiar al mancje e «ogni pas al devente un sfuarç di volontât». A acompagnâle in dutis lis sôs aventuris, però, al ancje il so om Romano Benet. La lôr dualitât, puartade ai confins de tiere, e je sinonim di aleance. Un mût gnûf di superâ i confins: insiemi. E cussì al e nassût il titul dal incuintri: “Si vince o si perde insieme”.
◆ “Artoo e Alchemilla: scoltant i fruts e lis frutis par lâ di là dai stereotips di gjenar” al è stât il secont event in program, curat di Alchemilla Milano, che e je une aziende dute feminîl jentrade a fâ part dal progjet european Ed.G.E. (che al vûl di “educâ lis gnovis gjenerazions ae avualance di gjenar”).
◆ Elisa Rota e Sara Salmi a àn contât la storie di Alchemilla, che e compagne lis frutis e i fruts intune riflession su la identitât, par lâ di là dai stereotips. Dut chest cun jutori dal ors Artoo, e stimui artistics par valorizâ lis vôs dai plui piçui e trasmeti i lôr pinsîrs e sintiments.
◆ Daspò, cui viers des poesiis e imagjins di Lussia Di Uanis e il saxofon e clarinet di Clarissa Durizzotto, il public al è stât acompagnât ae ricercje dal jessi e dal fâ. La lôr instalazion e rapresentazion, intitulade “Amazzone ferita“, e a l’obietîf di fâ capî che, midiant dal fâ, si rive a cirî fûr il se e a cognossilu fin da pît.
◆ Il laboratori “Saperi Situati“ al è stât inricjît di leturis che a contin des feminis tal timp di Dante. In graciis di une trame di contis, il public al à scoltât un confront sul significât dal lavôr, puartât sul palc des professoris Maria Livia Alga e Houda Boukal de Universitât dai Studis di Verone. Il lavôr al rapresente un valôr e ben comun pe societât, duncje al rapresente un dai struments e mieçs plui impuartants par lâ di là des disavualancis.
◆ Il circul di incuintris dal progjet al è finît cul spetacul “Donne che cambiano il mondo“, cun leturis e contis di Aida Talliente, acompagnade de vôs e musiche di Elsa Martin.
◆ “DIMMI. Le donne raccontano” nol è finît cu la rassegne, ma al sta puartant indevant laboratoris in tantis scuelis e centris di educazion in dute la regjon.
◆ Par cjalâ lis regjistrazions des trê seradis de seconde edizion dal progjet, e par scuvierzi di plui su cemût coinvolzi lis scuelis e partecipâ ai laboratoris, lait sul sît www.ledonneraccontano.it ❚