LInt AUTONOMISTE. Un «New Deal» pal Friûl

Mi somee che, insom dal an, al sedi impuartant rivâ a viodi cualis che a son stadis lis robis plui impuartantis pal Friûl in chest 2009. Dal sigûr, al prin puest e va metude la crisi, ma pardabon chê e je stade par dut il mont. Cualis lis particolaritâts di chenti? Il model industriâl in cualchi maniere al à tignût bot, cui contribûts de Regjon, cul jutori de casse integrazion: il presit paiât ae crisi, lu viodarìn il prossim an cui numars dai ocupâts. Daûr di une prospetive dal gjenar, e  ven fûr la pocje inteligjence politiche de classe dirigjente regjonâl, salacor la dipendence di une vision no autonome dal disvilup.
L’esempli plui clâr mi somee chel dal setôr agroalimentâr, dulà che il presit paiât dai contadins al è leât dal sigûr ae crisi mondiâl, ma soredut aes sieltis des multinazionâls. Invezit di capî lis potenzialitâts (se il setôr nol segne un mancul plui sec di altris, ma al mostre segnâi di soference par vie dal credit finanziari, un alc al volarà dî) e di conseguence judâlu, la zonte regjonâl e à decidût di taiâ i contribûts.
E cussì la strategjie di fonde e reste chê dal Friûl tant che tiere di passaç, de Tav e dai eletrodots, di cuatri pôi industriâi e de preiere ai parons di paiâ culì lis tassis.
Anìn a viodi chei pôi: il chimic di Tor di Zuin sot de spade dal incuinament, chel de cjadree di Manzan cence plui  gjambis, chel dal len Snaidero e Fantoni in dificoltât, chel dal fier Pittini, Danieli, grop Cividât che se a mancjin i bêçs dai amortizatôrs sociâi, a son muarts. Al stente fintremai chel dal persut di Sant Danêl.
New Deal, cemût si disial par furlan? Parcè che dome cuntun imprest dal gjenar si ven fûr di une situazion critiche. Ma e vûl une autonomie di pinsîr e di azion, ma soredut la idee che par cjalâ al doman, si à di jessi sigûrs da proprie fuarce. La unitât di un popul cui siei sorestants no je une robe che si cjate daûr dal cjanton, e ven fûr di sieltis condividudis e soredut de fiducie.
Par vêle però si scuen fevelâ la stesse lenghe, no dome in sens figurât.
Auguris.
Dree Valcic