ATUALITÂT – INCHIESTE La scuele / 2 – Lis domandis dai gjenitôrs

La scuele e je un sisteme complès formât di mestris, arlêfs e fameis. Daspò di vê fevelât tai numars passâts dai materiâi didatics a disposizion dai insegnants e di chei produsûts des scuelis, o sierìn cheste inchieste metint in evidence lis domandis dai gjenitôrs.
Ogni an al moment de iscrizion, daûr di ce che e previôt la L. 482/99 sul insegnament des lenghis mancul pandudis tes scuelis dal oblic, i gjenitôrs a àn di declarâ se a vuelin che al lôr frut ur vegni garantît l’insegnament de lenghe di minorance. Lis percentuâls di adesion a son simpri une vore altis, a dispiet di dutis lis polemichis che ogni an si sintin su chest argoment. L’ultin scandai al à metût in evidence che il 49,55% des fameis in regjon al à domandât di vê garantît chest dirit, percentuâl che in Provincie di Udin e cres fintremai al 64%.
IL PRIN SCANDAI_ Promotôr di cheste ricercje al è stât il dotôr Bruno Forte, cuant che al jere  Dirigjent dal Servizi Regjonâl Istruzion. «Il prin scandai al è stât fat intun moment particolâr. La leç nus imponeve di fâlu, ma a jerin une vore di dubis, ducj a disevin Spietìn. Jo invezit o ai sburtât par partî, consapevul dal risi, ma ancje dal bon risultât che al sarès saltât fûr» al spieghe il dotôr Forte. La materie e je simpri stade cjalde, e lis resistencis e lis dificoltâts politichis fuartis, ma Forte al è lât indevant movût di doi obietîfs principâi: marcâ la autonomie de scuele e colocâ la esperience intun contest plurilengâl. «La autonomie scolastiche dispès e ven interpretade malementri. Si platisi daûr de peraule autonomie par sierâsi, al contrari invezit chest ricognossiment al puarte la scuele a instaurâ un rapuart circolâr cul teritori, dulà che lenghe e culture a son elements fondamentâi di chest leam. Il scandai al è stât pensât propit par sburtâ lis scuelis a meti in vore chest rapuart. Po dopo i tignivin che e saltàs fûr la impuartance de educazion plurilengâl, tant che fatôr fondamentâl di ricjece de esperience didatiche».
RISPUESTE INSPIETADE_ La rispueste positive des fameis no je stade une sorprese ma une conferme dal alt nivel di cussience dai gjenitôrs. Il dât plui significatîf par Forte al è stât chel de scuele de infanzie, che nancje lui si spietave, e che al à marcât trop che e al è impuartant l’insegnament de lenghe pai gjenitôrs plui zovins. Magari cussì no, la politiche no à mai supuartât cheste sielte, no je mai stade buine di rispuindi in maniere fuarte e concrete a chestis esigjencis e dibisugnis. Ognidun al à tirât e pleât il discors de sô bande, ma la cuestion no je mai stade frontade a nivel alt e complessîf. «La discussion si ferme simpri a un discors piçul: furlan sì o furlan no, ma il discors al è globâl, al cjape dentri fintremai la specialitât de Regjon e chest nol è mai stât capît». Di fat, ogni an il probleme al salte fûr in chescj stes tiermins, come se insegnâ une lenghe al fasès dam a une altre: no si fevele mai di dimension plurilengâl, no si alce mai il nivel dal dibatiment.
I PROBLEMIS_ La scuele e à di frontâ diviers problemis par rispuindi aes esigjencis des fameis. Pal dotôr Forte lis plui impuartantis a son il meti adun e il meti in rêt dai materiâi di bon nivel produsûts des scuelis (element marcât plui voltis e di plui bandis), e la formazion dai insegnants tal so complès, e simpri intune otiche plurilengâl. «Par mieç de lenghe si capìs cemût che lis personis a interpretin il mont. Al è impuartant cjalâ la realtât di ponts di viste difarents, e la interculture e je un element fondamentâl di inricjiment ancje dal sisteme scolastic» al spieghe Forte, che i ten ancje a marcâ la ambiguitât che si plate daûr de peraule identitât, pal fat che e rimande al concet di identic. «La difese de identitât e pues fâ pensâ che si à di cjalâ dome cui che al è compagn di nô, cuant che invezit si à di pensâ a un sisteme di relazions. La nestre identitât no je ferme, ma vive e dinamiche, no si à di vê pôre dal avignî e des contaminazions, si à di vivilis come ricjecis, come valôrs zontâts par no sparî».
Federica Angeli