ATUALITÂT – Lenghis e lengaçs a confront… salvadi!

Ancje par chest an si è sierade la manifestazion di Cormôr Salvadi, in chel di Mortean, inmaneade de associazion Il cantîr, che al à come president Max Scarpa che in tancj za a cognossin pe sô ativitât di pitôr e di fumetist («Il barbe di Bepi», golaine editoriâl Cormôr Salvadi). Par precision, o sin rivâts ae XII edizion de vetrine culturâl, aromai deventade apontament fis pai apassionâts di musiche ma no dome.
E je tacade joibe ai 8 di Otubar, te sale civiche di Lavarian cun «Viaç a Scjavaçâ la gnot», un toc di teatri cjançon di Stefano Montello e di Cristina Mauro, nucli creatîf dai FLK, su la storie musicâl dal Friûl. Po dopo, vinars ai 9 e sabide ai 10 di Otubar lis seradis a son stadis dedicadis ae musiche, tal tendon di Festintenda a Cjasielis. Il prin apontament, curât de associazion Hybrida, al è stât cui grups dai Stâts Unîts Lucky Dragons e Terrible Eagle e lis lôr sperimentazions musicâls psichedelichis. Al à sierât il conciert Hybrida sound system, dj set furlan di suns e visions. La seconde serade e je stade incentrade sui suns de gnove musiche furlane, te sô ande plui rock. Sul palc i Fîl e Fiar, che a àn presentât il cd «Platimi», su tescj dal poete Massimo Govetto. Daspò Francis and the Phantoms, vincidôrs de ultime edizion dal Premi Friûl, che ancje lôr a àn presentât il cd cul lôr stes non. Un lavôr plen di sonoritâts dark punk cuntune anime leterarie, chê dal scritôr Checo Tam, vincidôr di concors impuartants tant che il Premi S. Simon, che in chest câs si trasforme in cjantant e performer. Ae fin, Not Only Noise, dj set di suns e rumôrs eletronics. Te serade dai 11 si è esibide in bisiac la poetesse Erica Benfatto; cun di plui, a àn partecipât chei dal Teatri Nazionâl Furlan, il grup di danze Piccolo Teatro Città di Udine e Brown and the Leaves, zovin cjantautôr furlan cu lis sôs baladis pop acustichis.
Par savênt di plui o vin sintût il curadôr artistic Pauli Cantarut, che nus conte cemût che la manifestazion e sta gambiant. Nassude tant che vetrine par musiciscj, cul lâ dal timp e je deventade simpri di plui un confront no dome tra produtôrs furlans ma ancje cun altris artiscj che a vegnin di fûr dal Friûl.
«Ma no son dome lis lenghis a jessi difarentis» al va indenant Cantarut, «a Cormôr Salvadi si presentin tancj lengaçs espressîfs: leterari, musicâl, teatrâl e no par ultin, la sculture (piere, len, e v.i.). Chest an, fevelant di esposizions, i visitadôrs de ex aree demaniâl di Cjasielis a àn podût viodi lis oparis dai scultôrs Pablo Garelli e Oreledigneur. Nol è di dismenteâsi che di chi a son partîts chei che a son deventâts protagoniscj no dome de golaine Cormôr Salvadi ma di dute la sene leterarie furlane, come i poetis Trastolons o il romanç Donald dal Tiliment di Stiefin Morat».
Al è impuartant ricuardâ  che il circul Il Cantîr di Mortean ogni an, finide la manifestazion, al dispon lis sôs oparis ancje in altris spazis visibii al public.
Venusia Dominici