Trilogjie tormentade e jentre tra i regâi pai nestris letôrs plui fedêi
Al mancje pôc a la fin dal 2009, ma ce che plui al conte al è che si svicine la pussibilitât di passâ inmò un an insiemit. E lis novitâts no mancjin. Tra chestis e je la jessude de seconde edizion di Trilogjie tormentade, il libri che pre Antoni Beline al veve presentât al premi Sant Simon 1999 e che al veve vinçût chê edizion. Esaurît za di timp, Glesie Furlane e à decidût di tornât a stampâlu inserintlu tal progjet «Opera Omnia» finanziât de Provincie di Udin. Il libri al è stât presentât martars ai 27 di Otubar (viôd l’articul di pre Tonin Cjapielâr a pagjine 17, ndr) inte biblioteche comunâl di Codroip colme di int in ocasion des iniziativis voludis dal comun par celebrâ i 30 agns di chest impuartant concors leterari intitunâl a Agnul di Spere (Agnul Pitane). Ta chê sere la vive vôs di pre Antoni Beline e je tornade a fevelâ a la platee numerose midiant des peraulis di pre Tonin Cjapielâr, un dai siei amîs e colaboradôrs plui strents, che al à fat une profonde e sintude analisi de opare, lant a meti in lûs i elements di comunion e di distinzion di don Lorenzo Milani, Oscar Wilde e Pieri Pauli Pasolini «Trê sants che nus condanin nô», ven dî trê figuris une vore contestadis de istituzion cuant che a jerin in vite ma che il timp al à fat viodi trop profonde che e jere la lôr vision de vite e la lôr azion, e che pre Antoni cul so libri al difint cun fuarce metint invezit a clâr i limits di chei che ju condanavin.
Par cui che nol ves podût partecipâ a la serade midiant di une convenzion esclusive pai nestri abonâts e je la pussibilitât di ricevi in regâl copie di «Trilogjie tormentade», seconde edizion.
Ma o vês di jessi svelts, parcè che lis copiis a disposizion no son infinidis e dome i prins che a rinovaran i abonaments a podaran gjoldi di cheste gustose publicazion zontant dome 5 euros al presit de sotscrizion che ur permetarà di ricevi par dut il 2010 inmò a cjase «La Patrie dal Friûl».
Par vê i libris o altris informazions su la bibliografie di pre Antoni Beline, si pues contatâ Glesie Furlane (www.glesiefurlane.org) a chest numar telefonic 0432-957268.
Cemût abonâsi: https://www.lapatriedalfriul.org/?page_id=7
