Sfuei Mensîl Furlan Indipendent
Archivi de Patrie

ATUALITÂT – Furlan su internet

............

Metût fûr in ocasion de zornade europeane des lenghis, ai 26 di Setembar, il sît www.furlanfriulano.eu al è introdusût di une biele schirie di videos li che a fevelin in lenghe  furlane tancj personaçs cognossûts ancje dal public talian, o  che a son dut câs rilevants pe lôr profession. A partî dal president de Regjon Tondo, un dai plui dispatussâts tal fevelâ par furlan di dut, a dispiet de sô fredece tal puartâ il furlan fûr dal ambient de famee.  Tra lis intervistis video ancje Remo Cacitti, Bruno Pizzul, Pierluigi Cappello, Pietro Enrico di Prampero, Glauco Venier…
Variis lis sezions, cun tancj materiâi di discjamâ e leams cun dutis lis realtâts principâls che si ocupin di furlan. Il sît al è stât realizât par cont dal Consorzi Universitari dal Friûl, cu la supervision artistiche di Sandri Di Suald, che o vin sintût par cualchi domande.
Sandri, cemût ise nassude la idee?
E jere une idee di bielzà cualchi an fa. Mi jeri inacuart che buine part de produzion par furlan e jere scognossude e al mancjave materiâl pe didatiche.
La idee e je rivade a disvilupâsi in gracie dal intassâsi di trê piçui budgets (realizazion di videos, materiâl informatîf, inzornament dal sît dal Cuf) che, singolarmentri, no varessin puartât a risultâts impuartants. Chest, o scuen dîlu, in gracie ancje dal supuart volontari, o a cost contignût, des tantis personis e associazions che a àn colaborât, e che o ringracii di cûr.
Il sît al è stât promovût cun inserzions publicitariis sul sît di Repubblica. Trops acès vêso vût in chei dîs?
O vin vût passe 5.000 visitadôrs. A puedin no sameâ tancj, ma il sît al jere di nicje e il passaç dividût cun altris inserzioniscj, considerât che no podevin permetisi masse. Ma il risultât al è stât cetant bon.  Si à ancje di tignî presint che i internautis si fermavin tor i cuatri minûts, vâl a dî par un timp une vore alt.
Il sît e je une vetrine pe lenghe furlane, ma une vetrine par atirâ clients e à simpri di jessi rignuvide. Ce vêso proviodût in chest sens?
Al è stât fat un grant sfuarç par prontâ cheste vetrine che e à carateristichis une vore impuartantis: un pês di mancul di 400 Kb par scuasit 43 giga di materiâl e 11.000 files. A front di chest, la sô gjestion e je une vore semplice. Cumò il vetrinist nol covente plui, e al baste un comès che al ledi indenant a meti dentri materiâl. Un lavôr che al podarès jessi fat di un sportelist cun scjadince trimestrâl. Miôr se a fossin lis scuelis e i interessâts a meti in rêt la lôr produzion, evitant i coscj di stampe. Pal imediât, si previôt di puartâ dentri i videos di vierzidure che a pesin sul acès e che, cul lâ dal timp, a pierdaran la lôr funzion comunicative mediade dai testimonials.
O zonti che chescj videos a vignaran trasmetûts des televisions locâls e o speri che a fasedin part di une prossime proiezion, in ocasion di manifestazions peadis ae culture e al cine furlan.
Redazion

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +