Sfuei Mensîl Furlan Indipendent
Archivi de Patrie

MEDITANTLIS TAL SO CÛR. Lôr nus condanin nô

............

La sere dai 27 di Otubar passât te biblioteche di Codroip e je stade presentade la gnove edizion de Trilogjie tormentade, opare di pre Antoni Beline, premi Sant Simon 1999. Pre Antoni in chel libri al presente il torment e la atualitât di trê «sants laics»: don Lorenzo Milani, Oscar Wilde e Pier Pauli Pasolini; trê oms condanâts ducj i trê sei de autoritât civîl che dai sorestants de glesie e de opinion de plui part de int. Intal libri, pre Antoni si met cence miezis misuris de lôr bande.
A son passâts ormai tancj agns de muart dai protagoniscj e dîs agns de publicazion dal libri: tra i doi contindints, i judiçs cualificâts de leç che a firmin la condane e i trê che a son condanâts, cui vevial reson? E pre Antoni aial smicjât just o sbaliât tal so judizi?

Pre Lorenzo Milani
Pre Lorenzo Milani

Don Milani cul libri Esperienze pastorali e cu la scuele di Barbiane al è stât la cussience critiche de glesie dal so timp.
Ancje jo in ‘seminari o soi stât tirâts sù in chê struture clericâl e cuant che cun Pape Zuan al è rivât il Concili, cu lis sôs novitâts, mi someave di respirâ a plens polmons une glesie gnove, frescje di Vanzeli e di puars, colme di sperance, di ideâi e di utopie. Cumò, come predi, mi cjati tun sacri sisteme cence avignî, fûr dal timp, strac e ripetitîf.
Al è ce che don Milani te sô luciditât di pinsîr al veve previodût. Chê glesie che e veve il fiât di condanâ il Priôr di Barbiane, de realtât dai fats si cjate vuê condanade.
Oscar Wilde
Oscar Wilde

Il stât de epoche vitoriane al à distrut Oscar Wilde, ma Wilde al à lassade une opare che e judiche no dome il secul de regjine Vitorie ma ancje il nestri mont di cumò. Il libri,
Il ritrat di Dorian Gray, al sfulmine la nestre societât alienade, cence anime, materialiste, atee, superficiâl e banâl. Al scriveve Günther Anders, muart tal 1992, che il marcjât, nestre divinitât imperant, no dome al à violentade la bielece dal mont ma al à corot ce che di plui nobil al è: la grandece interiôr dal om. E chest Oscar Wilde lu à vivût, paiât e scrit tai spiei dai siei vizis e de sô pinitince.
Pieri Pauli Pasolini
Pieri Pauli Pasolini

Pier Pauli Pasolini al à passade la sô vite, fint dai timps di Cjasarce, di procès in procès. Al à fat un dai plui famôs films sul Signôr: Il Vanzeli seont Matieu.
La sô muart, ai 2 di Novembar dal 1975, un delit politic pratichementi cence procès, nus fâs pensâ ai procès politics che mai a àn fat justizie: il stragjo di Bologne, Ustiche…, nus ricuarde lis bancjis cui lôr scandui smenteâts de leç e paiâts dai piçui, al è un spieli dal landri e gjespâr vergognôs de Rome di vuê. «… In un paese orribilmente sporco» al scriveve Pasolini, e al veve reson.
Par chest, leint la Trilogjie mi soi impensât de adultare che i fariseus a menarin li di Gjesù pe condane. Ma Gjesù ur disè: Chel di voaltris che al è cence pecjât che al tiri il prin clap cuintri di jê. E chei se son tovade un daûr l’altri, scomençant dai plui viei.
Nissun al vul platâ ce che Pasolini e Wilde  a son stâts, ma forzit al è il câs di dî come pe adultare: no sin nô che o vin di condanâ il Priôr, il scritôr e il regjist ma a son lôr che nus condanin nô.
Trilogjie tormentade: un libri che, se let, si pò tornâlu a lei, e se no let si fâs ben a lei.
pre Tonin Cjapielâr

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +