Sfuei Mensîl Furlan Indipendent
Archivi de Patrie

ATUALITÂT – Il Museu de Art dai faris e dai curtissârs di Manià

............

O contìn plui insot la realtât museâl che e zire ator de art di faris e di curtissârs, peade a strent cu la economie locâl di Manià.
Il museu (www.simbdea.it – Mafc), te gnove vieste, al è stât screât tal mês di Avrîl passât e la ativitât e je plene e interessante, poiade a nivel locâl e provinciâl, sostignude ancje cun contribûts regjonâi.
Cumò dôs personis a curin la part didatiche dant acet aes scuelis che a domandin e, nus à dit la dotore Roberta Altin de Universitât dal Friûl – responsabile sientifiche dal museu – «O vin chê di prontâ schedis didatichis pal an che al ven di proponi aes scuelis dal teritori, rinfuarçant cussì la ufierte». Fevelantnus de nassite dal museu, nus à dit che i pôcs artesans che a restin ancjemò a son stâts protagoniscj te fase de progjetazion, stant che prime di dut si ju à sintûts lôr e la catalogazion e je vignude «cun informadôrs locâi, sì che duncje si à progjetât scomençant dal bas, doprant i savês de comunitât». Impuartant tal progjet il rûl de Universitât dal Friûl che, cjapade dentri cuntune convenzion dal Comun di Manià, «e torne a meti in circul, cun esperiencis tant che chestis, lis sôs cognossincis teorichis, metintlis in vore, in chest câs, tune realtât museâl».
Il Coricama, nus spieghe Altin, «al à une specializazion tal cjamp de produzion des fariis e des curtissariis. Rapresentant la storie e la identitât locâl al è un museu etnografic, ma pai contignûts tratâts al jentre ancje te suaze dai museus tecnologjics e sientifics. Cheste dople vieste e je dal sigûr une fuarce in dì di vuê, li che societât, culture e tecnologjie a son peadis jenfri di lôr in maniere fuarte».
L’edifici al à doi plans espositîfs, cun trê sezions permanentis, un spazi par mostris temporaniis, une sale polifunzionâl doprade ancje pe didatiche, une aree dal museu provinciâl de vite contadine dedicade a lis tradizions artesanâls, un centri di catalogazion e di documentazion. Tal secont plan, al è un laboratori di restaur, l’archivi e il magazen ben ordenât, che al pues sei visitât dome di ricercjadôrs e di studiôs.
Il Coricama, che e jere sede di une filande, al da acet tai siei locâi a imprescj e a machinis dopradis tes produzions storichis dai curtis, scomençant dal batifier, passant ae buteghe artesane e po dopo a la fase industriâl. Lis trê sezions permanentis a disvilupin chestis tematichis: De ossidiane al ossit metalic: materiis primis, fonts di energjie, savês e pratichis, La farie dal mago: mistîrs e tecnichis dal curtissâr, De funzion ae Forme: evoluzions e trasformazions de produzion dai curtissârs di Manià. Il dut al è insiorât di esposizions di ogjets, di un aparât didascalic par talian, furlan e inglês, di un aparât iconografic fat di stampis, fotos, litografiis e catalics storics. Oltri ae ativitât espositive, aes visitis par man e ai lavôrs cu lis scuelis, a son altris events colaterâi che a rindin vîf un museu, che magari si pense tant che un puest par racueltis statichis, e invezit no: al à di jessi un lûc di confront, di studi, di scambiis di cognossincis, e ancje par chest si inmanein cunvignis. La prossime – Musei e promozione del territorio:  l’integrazione di aspetti tecnologici, economici e culturali – in program ai 14 di Novembar, e proviôt un confront comparatîf jenfri i museus dedicâts al curtìs, i trê plui impuartants de Europe: il Museu di Thiers (France), Albacete (Spagne), Solingen (Gjermanie), cun intervents di studiôs de Universitât di Udin, dal diretôr de Scuele di Specializazion in Bens Demantropologjics de Universitât di Perugia, di rapresentants de Simbdea e de Asdi (ents che e lavorin tal cjamp de museologjie, de conservazion).
Intant che o sin daûr a scrivi e je in vore une proteste di bande di esperts, studiôs, docents, ricercjadôrs e students di materiis demoantropologjichis, che a studiin e a lavorin sui bens culturâi, materiâi e imateriâi, ogjets, savês, pratichis, tecnichis, rîts che a partegnin ai mûts di vivi des tantis ints che a àn pescjât il teren di une Italie, fate di cetantis «tessarutis» etnografichis.
Un mosaic colorât e verglemât che al vignarà metût tes mans di altris professionalitâts che no son specifichis par chest setôr, tune suaze di riorganizazion dentri di une contratazion tra Sindacâts e Ministeri dai Bens e des Ativitâts Culturâls. Sù par jù a son stadis cjapadis sù 845 firmis e ancje cualchi cuotidian nazionâl al à dât spazi ae cuestion, ma il risi di cancelâ, tune otiche dal sparagn, competencis formadis di pueste cun scuelis di specializazion e cors di lauree, al è grant.
Si sa che come pe lenghe furlane, chestis notiziis no fasin scjas tant che la sieradure di une fabriche in timps di crisi, ma il nestri patrimoni culturâl, tal sens plui larc de peraule, al è un ben che al podarès puartâ vuadagn tant che la produzion industriâl, se al vignis conservât e valorizât di cui che al à lis competencis par fâlu, e chestis competencis a son. E je la storie di simpri, o vin la fortune te sachete e no sin bogns di sfrutâle. La nestre solidarietât sincere a ducj chei che a lavorin tal setôr, che a varessin di vignî invezit ringraziâts par dut ce che a rivin a puartâ ae lûs e ae nestre atenzion, judantnus a savê miôr ancje cui che o sin.
ELENA ZANUSSI

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +