LA CUINTRISTORIE DE OCUPAZION VENEZIANE. CE SUCEDEVIAL IN CHÊ VOLTE TAL MONT? La Ingletiere sdrumade di doi secui di vuere

Ancjemò une grampade di agns e la grande contraposizion tra France e Ingletiere, chê vuere tremende durade plui di cent agns (1337-1453), si sarès fermade, metint un pont di fin, sul calendari, ae Ete di Mieç. Cussì, il 1453 al rapresente une date impuartante che e segne la nassite dal stât nazionâl inglês. O almancul cussì nus contin i manuâi di storie, confondint come simpri il principi di stât e chel di nazion, dal moment che la corone britaniche e slargjave il so podê no dome sui inglês ma ancje sul Gales e su la Irlande (di li a pôc, ancje su la Scozie), scjafoiant simpri di plui, fintremai in dì di vuê, la lôr culture, la lôr lenghe, la lôr religjon e – intune peraule sole – la lôr identitât. E stiçave però tant che rispueste ancje un moviment di resistence e di contraposizion apassionante, là che i contadins gaelics a rivarin a supâ fûr de lidrîs di une culture ancestrâl la fuarce par oponisi ai lôr sorestants. Une croniche nus conte che sul finî dal secul XV, intun vilaç irlandês, lis fadis a scombaterin cuintri dai soldâts sunant la lôr pive, intonant i lôr incjantaments druidics! Dome plui tart, i tribunâi inglês a condanarin a muart une bande di contadins che si jerin vistûts come se a fossin spirts dal bosc, berlant la sapience dai lôr antenâts cuintri de violence dai lôr parons. Une corone fuarte, duncje, chê inglese, ancje se no rive a cjatâ subit la pâs, colant intune contraposizion civîl insanganade (1455-1485), là che lis fameis di York e di Lancaster, lis dôs rosis che dan il non a chel conflit, a pretindin dutis dôs di meti il cûl sul tron. E  come simpri, jenfri i barufants, velu li che al rive il tierç incomut, pront a gjoldi e a cjapâ sù dut ce che al reste intal plat. Si trate de famee dai Tudors, destinade a produsi personalitâts impuartantis tant che Indrì VII (nomenât re di Ingletiere e siôr de Irlande intal 1485), il riformadôr de economie rurâl, l’inventôr dai “cjamps sierâts” e di chel sisteme integrât che al meteve l’arlevament des pioris in rêt cu la lavorazion e cu la vendite de lane, intun circuit virtuôs che al anticipe, cu la creazion dai opificis, la rivoluzion industriâl dal secul XVIII. E, dopo di lui, Indrì VIII (re intal 1509), cu la sô Glesie anglicane, la supremazie de Corone sul Clericât, la trasformazion de Cort di Londre intune maraveose scune dal Rinassiment inglês. E la Tor di Londre intun lûc là che dissidents, opositôrs e feminis “disubidientis” a pierdevin il cjâf cuntune cierte facilitât. Soredut, dopo il timp insanganât di Marie la Catoliche, Elisabete I (regjine dal 1558 al 1603), la plui grande di ducj chei altris, e fo responsabile di chê grandece imperiâl e mondiâl che la corone e varès gjoldût fin al secul passât. Cun jê, la Ingletiere e à scuviert che no esist potence economiche o militâr cence la anime de culture. Lu diseve ancje un so protet, un ciert “Vielm” Shakespeare. Chel de storie di Lucine Savorgnan e dal so disperât amôr, par intindisi!  ❚