Sfuei Mensîl Furlan Indipendent
Archivi de Patrie

CE CHE O VIN PIERDÛT. La disubidience civîl e armade dai furlans cuintri dal Leon

Agnul Floramo

Tes cjartis de Serenissime si cjate la memorie
de Resistence de Patrie,
che i sbirats venits a cirivin di reprimi

La dominazion di Vignesie (1420-1797) e fo la cause di une situazion di conflitualitât estreme tra lis cjasis nobiliârs furlanis e lis comunitâts citadinis, tant che i plui di trê secui dal Leon a rapresentarin un sfaldament progressîf dal tiessût sociâl de  Patrie. Vignesie e gjoldeve di cheste situazion dal moment che e judave a strenzi i gredeis dal so glimuç politic, fondât su lis clapis e su lis clientelis di aleancis che a podevin judâ la oligarchie di lagune a fâ i siei interès su la “tiereferme”: une colonie di molzi, siore di risorsis teritoriâls pe flote mercantîl e di vuere, e ancje di lavoranzie a cost bas. Tancj a forin i furlans che, ridusûts intun stât di miserie, a lerin a jemplâ lis filis di chei mercenaris che i siôrs a dopravin tant che un esercit personâl, util par risolvi cualchi svindic o par esercitâ cu la pôre la lôr autoritât su lis vilis e su lis comunitâts de puare int. Se chest al è il cuadri di fonts, nol sarà dificil capî che la muart dal Patriarcjât e fo ancje la cause di un slargjâsi dal malstâ sociâl, trasformât in chê forme di deviance che dispès e cjape la muse dal banditisim, agjevolât di un clime politic degradât e ancje di chê nature salvadie e ruspiose che ancjemò e imperave fûr des campagnis: palûts, cjamps pustots, boscs e monts dificii di meti sot control. I magjistrâts mandâts di Vignesie, intes lôr relazions, a fevelin dispès di “gente feroce e facile ad ogni precipitosa resoluzione”, intate violente e lare, in sumis, cul gust dal riviel tal sanc, simpri golose di bandonâsi a situazions pericolosis, pronte ancje a piâ il fûc de disubidience civîl e armade, pûr di meti intal sac lis autoritâts che propit no rivavin a parâsi di nissune bande. Sassins, cuintribandîrs di sâl e di tabac, braconîrs e sbandâts a gjoldevin dal jutori de int, e adiriture ancje dai predis, che invezit di metisi de bande de leç e de justizie (chê dai parons!) a sunavin fintremai lis cjampanis par visâ che i soldâts o i sbirats a jerin daûr a rivâ. Pauli Sarpi (1552 -1623), consulent de “venetica sapienza”, al ricuarde ae “Eccellenza del Doge” che chi in Friûl oms e feminis a sglonfavin lis bandis di une umanitât che e veve pierdût l’orientament, une fradaie di vagabonts, mendics e di sbandâts fûr di ogni control, simpri pronts a metisi sot di un o di chel altri sorestant par cjatâ protezion e par fâ ce che ur comodave di plui. La Patrie e ven cussì descrite tant che une “speluncha de ribaldj e de mal fattori”: cussì al ven fûr di une assemblee dal Parlament tignude intal 1481. Udin aromai al jere deventât la sede dal lutignint, rapresentant uficiâl dal dôs, il plui alt in grât inte jerarchie dal domini venezian, che di fat al veve scancelât secui di autonomie aministrative che tantis comunitâts gruessis, ma ancje rurâls, a podevin sbandierâ cun tante braùre, indicant lis racueltis di statûts e di leçs scritis daûr de usance antighe dai lôr antenâts. Tancj esponents de nobiltât, pleâts e ridusûts a cortesans, a tacavin a bandonâ i lôr cjistiei trasferintsi in  citât, a Udin o adiriture a Vignesie. Ce che al è sucedût intal Carnevâl dal 1511, la joibe grasse di sanc che ben ducj aromai o cognossìn pai studis che a son stâts fats, e je dome che il sûr di une damigjane plene fin sul ôr di chê degradazion civîl e morâl là che la politiche dai gnûfs sorestants e veve ridusût la societât furlane, bandonade intun stât di anarchie complete. A sgarfâ jenfri lis cjartis dai procès criminâi, nus ven fûr un fresc di violence straordenarie: dut ce che al va ben par ofindi e par fâ mâl al ven doprât cuintri chei che si considerin nemîs. No bastin plui curtìs e pugnâli: il ‘500 e il ‘600 a son i secui dai velens. Chei di meti intal plat o intal cit de mignestre, ma ancje chei plui rafinâts, che a imbombin il tiessût di un façolet o di un vistît. O savìn di letaris invelegnadis no dome intes peraulis, ma ancje intal ingjustri: bastave vêlis pes mans e la muart e tacave ben planc a fâ il so mistîr. Par no fevelâ des bustis che a sclopavin in muse, cuant che si crevave il sigjîl par vierzilis. Une situazion complicade. Ma ancje une forme di Resistence. Se il sorestant al incjarne la leç, alore jessi bandît al voleve dî rivâ a berlâ cuintri di lui, alçant la bandiere de libertât. Al vâl ancje pe Sante Incuisizion, che chi in Friûl e pues jessi interpretade tant che un imprest par strenzi la lenghe dai furlans te glove dai sorestants. Altri che sotans! Altri che rassegnâts! Bisugne ricognossii a Vignesie un merit: nus à insegnât a dî “Siôr no!”. In sumis, o vin capît che jessi bandîts, eretics e laris al è simpri miôr che jessi sotans.  ❚

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +