L’Ecomuseu des aghis dal Glemonàs, un progjet fondamentâl par coinvolzi la popolazion inte conservazion e valorizazion dai bens culturâls e dal paisaç. Lis tantis iniziativis fatis dal Ecomuseu dal Glemonàs a son aromai cognossudis, ma di cumò e je a disposizion une tesi di lauree che e spieghe ben la impuartance di cheste realtât. La tesi si clame “Ecomusei tra patrimonio, comunità e territorio. L’Ecomuseo delle Acque del Gemonese: la partecipazione nei processi di costruzione di identità interculturali”. Le à scrite Laura Giavitto, 24 agns, di Glemone: cun chel lavôr, che al à vût tant che relatôr il professôr Andrea Guaran, la zovine si è laureade ai 30 di Març te Universitât dal Friûl. Laura Giavitto è à seguît il cors magjistrâl di “Comunicazion integrade par impresis e organizazion” de facoltât di relazions publichis di Gurize. La sô tesi e je il prin lavôr che al fronte la storie dal Ecomuseu dei aghis, che al è atîf za di 20 agns tal Glemonàs: «E je un realtât – e spieghe Laura – che o cognòs ben, viodût che o colabori cun lôr di trê agns. Tal stes timp, o condivît i valôrs di tutele e di valorizazion dal teritori: ancje par chest, o ai cjapât la ocasion di studiâlu par laureâmi ma ancje par lassâ un imprest che al pues jessi util pal stes Ecomuseu». Te sô tesi, la studiose glemonate e à dedicât un prime part ae storie dal Ecomuseu, cuntune atenzion su la legjislazion dal setôr e une buine ilustrazion dal rûl che al à inte tutele e inte divulgazion dal patrimoni des comunitâts là che al è inserît, ven a stâi i Comuns di Glemone, Buie, Osôf, Dartigne, Maian e Montenârs: par puartâ indenant il studi, la studiose glemonate si è siervide ancje di cuistionaris soministrâts aes personis.
◆ La seconde part e je invezit dedicade aes mapis di comunitât, une ativitât partecipative che l’Ecomuseu al à inviât di timp pai câs di Gôt di Glemone e a Montenârs. Cumò Giavitto e sta daûr ae mape de comunitât di Susans di Maian che si vûl realizâ: «Lis mapis di comunitât – e dîs Giavitto – a son imprescj impuartants che a coventin par rindi la comunitât cussiente dal so teritori. Al è un percors che al permet aes personis di confrontâsi cu la lôr storie e cun chê dal teritori là che a vivin. Di chê altre bande, une mape di comunitât e devente utile ancje par une aministrazion publiche, par esempli cuant che e vûl programâ intervents coordenâts sul teritori. Par chel che al inten il progjet di Maian, purtrop al veve di partî te Vierte ma cu la emergjence dal corona virus o vin scugnût fermâsi e cumò o sin daûr a lavorâ par tornâ a partî». Al è propit midiant dal coinvolziment diret de int che un operadôr ecomuseâl al rive adore a creâ une mape di comunitât, tirant sù il savê de popolazion, coordenantlu e ae fin inserintlu intune uniche mape: «Il facilitadôr – e spieghe Giavitto – che al lavore su la mape, al à il compit di negoziâ lis informazions che al tire dongje: al scuen favorî la plui grande partecipazion pussibile e ae fin rivâ a di une rapresentazion condividude. Ogniun al à ciertis sensibilitâts e atenzions, ma la mape finâl e scuen rapresentâ ducj». Cussì al è stât pe mape di Montenârs, dulà che si à rivât a coniugâ lis istancis de popolazion cun chês de aministrazions. Ta chel câs, cuntune comunitât di 500 personis, si à vude une grande partecipazion viodût che ae fin lis mapis a son stadis dôs: une par Montenârs e une pal borc di Flaipan. A Susans, i numars a son un pôc plui grancj ma za i prins contats a àn puartât Giavitto a proponi un model gnûf di mape, chê “interculturâl”: «Inte societât di vuê – e spieghe – no si pues lavorâ dome cuntune componente, viodût che ancje tai nestris paîs a vivin personis cun divignincis diviersis. Ogniun al à un so model di comunicâ, di dâ impuartance a une robe pluitost che a une altre. Al è clâr che in chest câs al è plui dificil rivâ a di une rapresentazion condividude, ma al è pussibil. Dispès si fasin indenant lis personis plui anzianis che a son impuartantis pal savê che a trasmetin, ma bisugne visâsi che al è impuartant coinvolzi ancje i zovins». Cumò che e à finît i studis, Laura Giavitto e lavore intune bancje ma e va indenant a colaborâ cul Ecomuseu des aghis: «Jo che o soi vignude a Glemone cu la mê famee che o vevi 16 agns – e conte Giavitto – cul Ecomuseu o ai vût la oportunitât di cognossi il teritori sot ponts di viste che non varès mai pensât. Al è stât par me biel ancje viodi la buine rispueste e partecipazion de int aes tantis iniziative che a son stadis inmaneadis dilunc vie dai agns». ❚
