Balt Hüttar,
Trinkh Met Miar,
Areasonica, 2018
Si clamin Balt Hüttar, a son in cinc di lôr e a metin adun une misture plasevule di folk e rock che in cualchi câs e cjape sù une ande plui epic metal e in cualchi altri moment e va plui daûr di sugjestions leadis ae dimension cence timp dal bal.
Il grup al esist za di cualchi an e la sô particolaritât e je chê di doprâ te plui part dai tescj des sôs cjançons il todesc antîc des comunitâts dai Cimbris de zone di Slege/Asiago. Juste cualchi mês indaûr al à dât fûr il so secont disc, dal titul Trinkh Met Miar, che al rapresente ben l’imagjinari musicâl di cheste formazion e al da cont de evoluzion dal so progjet artistic.
I “Vuardians dal bosc” (par furlan il lôr non si pues voltâlu cussì) a mostrin di vê snait e energjie. Forsit no son masse inovatîfs, ma la origjinalitât de sielte linguistiche pai tescj e il bon nivel tecnic des lôr esecuzions a son za doi bogns motîfs par scoltâju cun interès. ❚
Marco Stolfo