Sfuei Mensîl Furlan Indipendent
Archivi de Patrie

I COLÔRS E LIS FORMIS DE STORIE: UN VIAÇ INTE ART DAL FRIÛL. Storiis che a nassin di bleons e di maiis. Puartis viertis sui siums

............

Ce vuelial dî colâ dentri di un cuadri, esplorâ lis penombris di un afresc,
fâ vivi une statue, sintî ce che nus conte une ancone, une miniature, une stampe? Cheste rubriche e puarte ae scuvierte des oparis di art che e je siore la Patrie,
ma lis conte dal didentri, cu la vôs dai lôr protagoniscj, intun zûc gnûf e intrigant.

Giuliana Fonzar e je une artiste furlane cetant inovative e interessante. Di timp, e je daûr a esplorâ une tecniche che si clame “patchwork pitoric”. Cuntune pazience infinide e recupere tocuts di tele di dute chê mont di peçots che a restin dismenteâts par agns tai scansei di cjase: bleons, maiutis, golarinis, façolets, suiemans. Materiâi diferents par colôr, grane, consistence. Dopo vêju fats a blecs e strissulis, e cûs insiemi i tocs par dâ vite aes sôs figuris. La operazion e podarès someâ une “recherche” proustiane impegnade a cirî fruçons di vite passade par trasformâju in sensazions, emozions, alfabets misteriôs vignûts fûr des pleis di un imagjinari fecont e gjenerôs. Un lavôr resint de autore furlane, intitulât “Oltre i confini della fisica”, al è stât selezionât a rapresentâ la Italie inte suaze dal “Contest EQA 2018” (e cu la Fonzar, ancje altris siet artistis), che si davuelzarà a Birmingham, e che al sarà destinât par doi agns a zirâ in Europe.

Lis tematichis plui dongje de sensibilitât di Giuliana Fonzar a son peadis ae rapresentazion di une realtât che dome in aparence e descrîf une prospetive obietive e concrete: ambients, architeturis, cjamaris, zardins a fasin simpri di fonts a figuris umanis che a strissinin l’osservadôr intune dimension alternative, provocatorie, là che il voli interiôr al vinç simpri sul element razionâl, e lu cjape dentri, presonîr dal contest che aromai lu oblee a sgarfâ dentri des pleis plui scuindudis dal so cûr. I cuadris a deventin cussì puartis viertis su la profonditât dai siums, e dut ce che si viôt e che si contemple al cjape sù un valôr simbolic potent e inmagant. In particolâr, si percepìs une atenzion grande e straordenarie pal mont feminîl, esplorât in dute la sô fuarce evocative e sensuâl. Lis feminis rapresentadis de artiste – dispès ispiradis di personis reâls, che cun jê a àn inmaneât un rapuart di amicizie e di esperiencis condividudis – a son traviersadis di une cjarie emotive fuarte che e fonde la sô energjie intune dimension pre logjiche e junghiane.

Il cuadri che al inspire la storie di chest mês si clame “Claudiana” (grant 47 centimetris par 59). Realizât tal 2107 cu la tecniche dal “patchwork pitoric”, al rapresente une femine dominante, plui sensuâl che no agressive, ancje se e ten un scorein inte man. Ae delicatece dal profîl de muse, a pene sfilât, i fâs cuintri la materialitât poderose dal sen discrotât e la curve feconde dai flancs. Un rincjin, un braçalet e un medaion a sugjerissin di pensâle tant che une siore elegante, salacor de buine borghesie, braurose dal so stât sociâl. Ma la pose anticonvenzionâl, trasgressive, stramontante (une part dal scorein al jes fûr de suaze) e vûl declarâ une volontât esplicite di jessi fûr di ogni scheme imponût de consuetudin sociâl par lassâ plene libertât aes pulsions plui profondis e misteriosis de sô psiche. ❚

Agnul Floramo

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +