Ancje “La Patrie dal Friûl” ae tierce edizion de fieste nassude par pensâ ae pâs divertintsi

MAKE FRICO NOT WAR FEST
Il Prin di Lui, a Tramonç Disot, Floramo cu la «Cuintristorie de Prime Vuere Mondiâl»
Une fieste par divertîsi, par mangjâ, ma ancje par pensâ. La “Make frico not war Fest” e fâs trê, e cuntun program simpri plui siôr e impuartant. Il lûc, simpri il Camping val Tramontine di Tramonç Disot. Il non dal avigniment al ven de maiute famose de Friûlpoint, che e colabore ae realizazion.La fieste e partirà cul bot aes 11 de matine dal Prin di Lui cul spetacul umoristic cetant divertent dai Papu, veris superstars dal umorisim de zone di Pordenon.
Dopo il divertiment, a partissin i moments impuartants di riflession: aes 2 e mieze dopomisdì e fevelarà Elena Mazzoni, responsabile de campagne nazionâl StopTTIP che e sclarirà a ce pont che al è il Tratât transatlantic sul cumierç, che al someave rivât a un stop momentani e che al continue invezit a menaçânus cu lis ricjadudis pussibilis su la nestre vite di ogni dì.
Po dopo, aes 4, Agnul Floramo al presentarà il libri «Cuintristorie de Prime Vuere Mondiâl», publicât di Patrie dal Friûl, cun Dree Venier, ex diretôr dal mensîl che al à viodût dal progjet, introdots de diretore di cumò Erika Adami.
Il protagonist culinari de fieste, il frico, chest an al sarà par cure dal team che al à fat il frico plui lunc dal mont a Cividât, intune manifestazion restade mitiche che si è davuelte intal 2016 inte citât ducâl. Par onorâ il lûc de fieste, in bande di chel classic, al è anunziât un frico speciâl ae pitine, la innomenade specialitât locâl. La cusine e vierzarà a misdì.
Aes 6 sot sere, al sarà il conciert di “Leo Virgili & The Daisy Chains”, grup che al fâs musiche “surf” (ae Beach Boys), ma cun ritmis plens di snait e cence respîr, messedâts ae musiche pulp dai B-Movie, dai cines horror e… dai mariachi messicans. Il divertiment al è sigurât.
Il frico e il ristôr a restaran ancje par cui che al volarà fermâsi a cene.
La Friûlpoint e parteciparà cu lis sôs maiutis dant altri colôr ae fieste: e puartarà lis gnovis maiis dal 2018, cun realizazions speciâls pal avigniment e regâi a estrazion pai ospits.
L’avigniment si fasarà ancje in câs di brut timp, dutis lis informazions su www.camptramontina.com ❚
Par cure de redazion