Sfuei Mensîl Furlan Indipendent
Archivi de Patrie

Une Europe di comunitâts che a resistin

............

lapontament “improibît fevelâ” a vicino/lontano (foto Luca Dagostino / Phocus agency)
l'apontament “improibît fevelâ” a vicino/lontano (foto Luca D'agostino / Phocus agency)

De Grecie ae Catalogne a rivin “lezions” buinis par ducj
L’apontament “Improibît fevelâ”, inmaneât de Agjenzie Regjonâl pe Lenghe Furlane ai 11 di Mai te suaze dal festival vicino/lontano, al à permetût di confrontâ diviersis realtâts minorizadis dentri e fûr de Europe. Tra i elements jessûts de discussion a meretin marcâts almancul trê: la dibisugne di cognossisi di plui e miôr tra minorancis, il faliment des istituzions europeanis tal difindi i dirits des nazionalitâts minorizadis, la impuartance de integrazion dai migrants tes comunitâts di minorance.
Il prin element di notâ al è trop pôc che, te ete des rêts sociâls e des gnovis 24 oris su 24, si cognòs de realtât des comunitâts minorizadis. Par solit, juste par fâ un esempli, si tint a associâ il dinei dai dirits des minorancis e il centralisim al Stât francês là che invezit, a fuarce di lotis, no mancjin spazis di autoguvier e misuris di tutele pes lenghis minorizadis. Cuasi nissun invezit al sa ce che al sucêt in Grecie là che si à, cun dute probabilitât, la situazion piês dentri de Union Europeane. Alì, di fat, l’implant ideologjic dal Stât al reste inmò chel dal secul XIX fondât suntun popul sôl, suntune religjon sole e suntune lenghe sole. Al sucêt cussì che ducj i partîts si cjatin in cunvigne tal dineâ che dentri dai confins statâi si vedi olme di minorance. La uniche ecezion, imponude dai acuardis di pâs cu la Turchie, e inten la concession di cualchi dirit ai musulmans de Tracie. Concession che però e devente ancje chê ocasion di opression par vie che si impon l’ûs dal turc ancje a ducj chei musulmans che a àn come lenghe proprie il pomac (lenghe slave de Tracie setentrionâl).
Lis politichis di elenizazion sfuarçade, il dinei dai dirits e fintremai de esistence des minorancis nazionâls, lis violencis e lis persecuzions cuintri dai militants di chestis comunitâts no son plui cussì brutâls come chês metudis in at te prime metât dal secul XX, ma a van dilunc a jessi, magari cussì no, di plene atualitât. Lu à contât a Udin la ativiste de minorance macedone, Eugenia Natsoulidou, ma si lu à viodût benon ancje cu la agression patide ai 20 di Mai dal sindic di Tessaloniche, Yiannis Boutaris, membri de comunitât valache e promotôr di politichis di inclusion des minorancis nazionâls e religjosis.
Il cidin des istituzions europeanis su la situazion greghe al fâs il pâr cul compuartament mostrât denant dal procès di autodeterminazion de Catalogne e massime des violencis de polizie spagnole in ocasion dal referendum dal Prin di Otubar e de repression judiziarie che i à vignude daûr. A son masse lis voltis che si à viodût la Comission europeane tasê o pûr sostignî i guviers statâi e lassâur cjamp libar ancje cuant che i passin parsore a chei valôrs di democrazie, di avualiance e di libertât che a pretindin di difindi, par pensâ che a sedin dome incidents di percors. Al è clâr aromai che la Union Europeane e rapresente dome i interès dai guviers statâi che le componin e no un sogjet indipendent in stât di tutelâ i dirits dai citadins e des comunitâts linguistichis e nazionâls che a vivin dentri dai siei confins.
Propite la vicende catalane e certifiche il faliment des istituzions europeanis. Cussì, intant che lis magjistraturis dai singui Stâts a fasin colâ une daûr di chê altre lis acusis dai judiçs spagnûi e a refudin di estradâ i politics catalans in esili, intant che Amnesty International e denuncie i pidiments o fintremai la mancjance di investigazions su lis violencis dal Prin di Otubar, la Comission e il Parlament europeans no son nancje bogns di fâ buine une mozion di censure pal compuartament des istituzions spagnolis.
Un tierç element di interès jessût dal incuintri di Udin si riferìs aes politichis metudis in vore tai confronts dai migrants cui esemplis che a rivin dal Quebec e de Catalogne. Tal prin câs, lis sieltis fatis dai francofons, massime sul imprin, a jerin indreçadis a tignî a distance i migrants (ancje chei plui “compatibii” par lenghe e religjon tant che i talians): un erôr paiât cjâr in ocasion dal ultin referendum su la indipendence là che il vôt de comunitât taliane al è stât decisîf pe sconfite. Lis istituzions autonomis catalanis invezit a son stadis atentis fin dal principi tal svilupâ percors politics, sociâi e scolastics di integrazion dai migrants. Par rindisi cont che la strade sielzude e je daûr a paiâ, al baste partecipâ a cualchidune des manifestazions pe indipendence de Catalogne.
Si trate di temis che a meretaressin di jessi frontâts plui a fonts, ma che, chel istès, a permetin di rigjavâ cualchi indreçament, o sei: spietâsi di mancul di chestis istituzions comunitariis e lavorâ dal bas par fâ sù un model diferent di Europe, infuartî o svilupâ gnovis rêts di contat e di solidarietât cun chês altris comunitâts minorizadis, e impegnâsi par integrâ ben i migrants tes comunitâts locâls. Propuestis di azion che a puedin simpri tornâ buinis par cui che, ancje in Friûl, al lavore a pro dai dirits e dal autoguvier des comunitâts minorizadis.
di Carli Pup

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +