«Nissun puest miôr des stradis, dulinvie paîs e boscs neris, par stuzigâ la fantasie e fâ nassi une flabe. Flabis di aganis e orcui. Di Sant Pieri ator pal Friûl cul Signôr e Sant Zuan, saldo strac e cul pinsîr di parâ vie la fan. E di tancj altris di lôr ancjemò».
Cussì e sune la introduzion a la prime sezion di chest libri, risultât di une vore didatiche dai fantaçuts di dôs classis primis e di une tierce vie pal an scolastic 2001-2002. Jenfri lis cinc presentazions e va segnalade chê dai gjenitôrs dal comitât des scuelis di Listize che a àn pensât a cjatâ i finanziaments necessaris e a sostignî il lavôr dai arlêfs e dai insegnants. Vot a son lis sezions: “Cjamine cjamine”, “In vore”, “In vuere”, “La aghe”, “I fruts”, “Il Signôr”, “La libertât”, “La nestre strade”.
Chescj zovenuts a son lâts ator pal paîs a incuintrâ personis anzianis, a àn stât sot cu lis domandis a vons e avis, a àn scrutinât il teritori. E a dut chel che a àn cjapât sù, ur àn dât forme scrite par furlan (cu la revision dal professôr Ivano Urli). E cussì al è saltât fûr un libri plen di contis gustosis, come chê de conversion miracolose dai furlans (divuardi tocjâur il vin!), ricuarts di vuere (la ritirade di Russie, i sfolâts a Litorie), progjets pal avignî (ognidun al à di cirî la sô strade), storiis di amôr e di emigrazion, lis aganis buinis, ma no starlocjis, ce che al vûl dî fâ Sant Martin e fâ Sant Marc, i puars zûcs di une volte, i cercandui e vie indevant.
Di segnalâ a son ancje i dissens cui fumuts, opare di Davide e Enrico.
A completin il libri sedis pagjinis dedicadis ae grafie, cun filastrocjis, esemplis e frasis par sfrancjâsi e, insom di dut, la liste dai autôrs cui nons di chei che a son lâts a intervistâ.
Un libri plen di morbin, di storie, di gjeografie, che al è ancje un strument didatic une vore impuartant e preseôs. Al è dome di imagjinâsi cetant che a àn di jessisi divertîts chescj fruts a metilu adun e cetant che a puedin jessint braurôs!
Scuele medie statâl di Listize, Suntune strade. Antologjiute furlane, cun notis di grafie, Tavagnà, 2003
di Laurin Zuan Nardin
